हामी सबैकाे संसारन्यूज

९ चैत, बहराइन । बहराइनमा रहेका तीन नेपालीलाई कोरोना भाइरस संक्रमण भएको छ ।

कोरोनाको आशंकामा क्वारेन्टाइनमा राखिएका ६ नेपालीमा ३ जनामा कोरोना पोजेटिभ देखिएको नेपाली दूतावास बहराइनले जनाएको छ ।
दूतावासका अनुसार उनीहरु दुई पुरुष र एक महिला रहेका छन् । उनीहरुलाई बहराइन सरकारले राम्रो उपचार गरिरहेको छ ।

बहराइनमा हालसम्म ३१० जनामा कोरोना संक्रमण देखिएको छ । उनीहरु मध्ये १२५ जना निको भएर घर फर्किसकेका छन् भने १ जनाको मृत्यु भएको बताइएको छ ।

यसैबीच दूतावासले बहराइनमा रहेका नेपालीहरुलाई सुरक्षा सतर्कता अपनाउन भन्दै बहराइन सरकारले सबै प्रवासी नागरिकलाई उपचारको व्यवस्था आफ्ना नागरिकलाई सरह गरेकाले नआतिन आग्रह समेत गरेको छ ।

स्मरण रहोस्, यसअघि पोर्चुगलमा एक, दुवईमा दुई जना नेपालीमा कोरोना भाइरस संक्रमण भएको समाचार आएको छ भने बेलायतमा शनिबार एक व्यक्तिको मृत्यु भएको छ । बहराइनमा पनि दुई जनामा संक्रमण पुष्टि भएएसँगै विदेशमा कोरोना संक्रमितको संख्या ५ पुगेको छ भने एकको मृत्यु भएको छ ।