हामी सबैकाे संसारन्यूज

१० चैत्र, काठमाडौँ । गैरआवासीय नेपाली संघले विश्वव्यापी रुपमा फैलिएको नोबेल कोरोना भाइरस(कोभिड १९) विरुद्ध जुध्न नेपाल सरकारलाई १ करोड रुपैयाँ सहयोग दिने घोषणा गरेको छ ।

संघका अध्यक्ष कुमार पन्तले कोरोना महामारीसँग लड्नका लागि संघको तर्फबाट १ करोड आर्थिक सहयोगको घोषणा गरिएको जानकारी दिएका छन् । संघको आइतबार बसेको ७२ औं बैठकले १ करोड रुपैयाँबराबर प्रधानमन्त्री राहत कोषमार्फत् वा सल्लाहबमोजिम औषधिजन्य सामग्री सहयोग गर्ने निर्णय गरेको उनले बताए ।

यसैबीच संघले कोरोना संक्रमितको सहयोगार्थ अध्यक्ष कुमार पन्तको अध्यक्षतामा एक उच्चस्तरीय समिति, त्यस मातहत संघका कोषाध्यक्ष महेशकुमार श्रेष्ठको संयोजकत्वमा राहतकोष संकलन उपसमिति र उपाध्यक्ष डा. बद्री केसीको संयोजकत्वमा भौतिक सामग्री सहयोग संकलन उपसमिति गठन गरेको छ ।

संघले विश्वभर छरिएका आफ्ना शाखामार्फत् कोरोना संक्रमित नेपालीको तथ्याङ्क संकलनको तयारी पनि गरिरहेको पन्तले बताए ।
संघका विभिन्न देशमा रहेका राष्ट्रिय समन्वय परिषद्हरुले पनि सूचनामार्फत कोरोना भाइरसबाट सुरक्षित रहन र समस्यामा परे कहाँ कसरी सम्पर्क गर्ने जानकारी गराईरहका छन् ।