हामी सबैकाे संसारन्यूज

२४ चैत, पोर्चुगल । गैरआवासीय नेपाली संघ पोर्चुगलल कोरोनाबाट प्रभावित नेपालीहरुलाई दोश्रो चरणको राहत वितरण सम्पन्न गरेको छ । यसअघि मार्च २९ मा पहिलो चरण अन्तर्गत १५० भन्दा बढीलाई राहत वितरण गरेको थियो भने दोश्रो चरण अन्तर्गत अप्रिल १ तारिखमा पनि अल्गार्भ क्षेत्रिय समितिले ३५ जनालाई वितरण गरेको थियो ।

त्यसैगरी तेश्रो चरण अन्तर्गत अप्रिल ३ मा लिस्बन बाहिर अलेन्तेजु क्षेत्रिय समितिले ३७ जनालाई गरेर विभिन्न पाँच क्षेत्रबाट राहत वितरण गरिएको बताइएको छ ।

पोर्चुगलमा कोरोनाको संक्रमण बढ्दै गएपछि त्यहाँको सरकारले मार्च १८ देखि लकडाउन गरेको छ । पोर्चुगलमा अधिकांश नेपाली कामदारहरु रेष्टुरेण्ट, होटल तथा कृृषि क्षेत्रमा कार्यरत रहेको र ती क्षेत्र अहिले बन्द रहेका कारण उनीहरु बढी मारमा परेका छन् ।
पोर्चुगलमा आज (६ अप्रिल) सम्म संक्रमितको संख्या ११ हजार ७३० जना पुगेका छन् भने १४० जना पुर्ण निको भएर घर फर्किएका छन् ।
त्यसैगरी हालसम्म मृत्यु हुनेको संख्या ३ सय ११ पुगेको छ ।

पोर्चुगलमा कोरोना भाइरसबाट धेरैको संख्यामा नेपालीहरु पनि संक्रमण भएको आशंका गरिए पनि हालसम्म ११ जना नेपालीले मात्र आफूलाई कोरोना संक्रमण भएको सार्वजनिक गरेको बताइएको छ ।

त्यसैगरी यसअघि कोरोना संक्रणको आशंकामा क्वारेन्टाइनमा राखिएका १७ जना नेपालीको रिर्पोट नेगेटिभ देखिएपछि उनीहरु आइतबार क्वारेन्टिनबाट मुक्त भएको बताइएको छ ।