Sansar News
७ पुस, बन्जुल (गाम्बिया) । निर्वाचनमा पराजित भएका गाम्बियाका राष्ट्रपति याहया जम्मेहले पद त्याग गर्न अझै अस्वीकार गर्नुभएको छ ।
गत डिसेम्बर १ तारिखका दिन भएको निर्वाचनमा पराजित भए पनि उहाँले निर्वाचनको मतपरिणाम अस्वीकार गर्दै पद त्याग गर्न अस्वीकार गर्नुभएको हो ।
पश्चिमी अफ्रिकी मुलुक गाम्बियामा विगत २२ वर्षदेखि शासन गर्दै आउनु भएका जम्मेहलाई उहाँका प्रतिस्पर्धी अदाम बर्रोले पराजित गर्नुभएको थियो ।
जम्मेहले निर्वाचन भएको एक हप्तापछि मत परिणाम नस्वीकार्ने बताउँदै नयाँ निर्वाचन गर्न माग गर्नुभएको थियो ।
उहाँले मतपरिणाम नस्वीकार्ने बताएको भोलिपल्ट राष्ट्रसङ्घीय सुरक्षा परिषद्ले सार्वभौम जनताको रोजाईलाई नस्वीकार्नु जम्मेहको गल्ती हुने टिप्पणी गरेको थियो । राष्ट्रपतिमा नवनिर्वाचित अदाम बार्रोलाई कुनै सर्तविना कुनै ढिला नगरी शक्ति हस्तान्तरण गर्न पनि सुरक्षा परिषद्ले आग्रह गरेको थियो ।
राष्ट्रसङ्घका महासचिव बान की मुनका प्रवक्ताले पनि वक्तव्य जारी गरी कानुनी प्रक्रियालाई स्थापित गर्न आह्वान गर्नुभएको थियो । गाम्बियाका जनताले निर्वाचनमार्फत व्यक्त गरेको चाहनालाई सम्मान गर्न पनि मुनले आग्रह गर्नुभएको वक्तव्यमा भनिएको थियो ।
राष्ट्रिय तथा अन्तर्राष्ट्रिय दबाबहरू पर्दा पनि जम्मेहले अहिलेसम्म पनि मतपरिणाम अस्वीकार गर्दै पदत्याग गर्न अटेर गर्नुभएको छ ।
अहिले राष्ट्रपतिमा पराजित हुनु भएका जम्मेहले सन् १९९४ देखि सैनिक शासकको रूपमा गाम्बियाको सत्ता सम्हाल्नु भएको थियो । गाम्बिया २० लाखभन्दा कम जनसङ्ख्या रहेको निकै सानो अफ्रिकी मुलुक हो । एएफपी
वि.सं.२०७३ पुस ७ बिहीवार ०३:३६ मा प्रकाशित
