हामी सबैकाे संसारन्यूज

२० वैशाख, काठमाडौँ । ललितपुर बुद्ध जयन्ती कोषले यसपटकको २५६४ औँ बुद्ध जयन्ती आ–आफ्नो टोलमा दीप प्रज्वलन गरी बुद्ध पूजा, पाठ पूजा, धर्मदेशना गरी मनाउन अपिल गरेको छ ।

कोषका अध्यक्ष धर्मबहादुर शाक्यद्वारी प्रेस विज्ञप्तीमा नेपालको राष्ट्रिय विभूति, विश्व बन्ध, शान्तिनायक महामानव गौतम बुद्धको जन्म, बुद्धत्व प्राप्ती तथा महापरिनिर्माण दिवस संस्मरण गर्दै टोलटोलमा पालो दिइ भव्यताका साथ मनाइँदै आउने गरिएको भए पनि यसवर्ष कोरोना भाइरसका कारण एकै ठाउँमा भेला भई मनाउने अवस्था नरहेको भन्दै उक्त अपिल गरिएको छ ।

यसपटकको बुद्ध जयन्ती ललितपुरका रुद्रवर्ण महाविहार ओकुबहालले मनाउने अवसर पाएको र त्यसका लागि तयारी गरिएको भएपनि देशको विषम परिस्थितिका कारण सम्पूर्ण धर्मालम्बी नेपाली दाजुभाइ तथा दिदीबहिनी तथा ललितपुर जिल्लास्थित सम्पूर्ण विहार वहिल तथा बौद्ध संस्थाहरुलाई आ–आफ्नो टोलमा विहार वहिलमा दीप प्रज्वलन गरी मनाउन कोषले अनुरोध गरेको हो ।

विज्ञप्तीमा कोरोना भाइरसका कारण विश्वमा ज्यान गुमाउने सम्पूर्णहरुमा श्रद्धाञ्जली व्यक्त गर्दै संक्रमितहरुको शिघ्र स्वास्थ्यलाभको कामना गरिएको छ ।