हामी सबैकाे संसारन्यूज

देशैभरि ढुङ्गैढुङ्गा डाँडाकाँडा मात्र
आपसमा शङ्कैशङ्का चलखेल मात्र
अनुहार भए पनि मानिसको जस्तो
व्यवहार भने लाग्छ शिवगणको जस्तो

कपडा छन् जति पनि तर तन नाङ्गो
लागे पनि सरल झैँ भित्र मन बाङ्गो
अनुदान ऋण लिई तलब भत्ता खान्छ
निम्तो पाए खानलाई जहाँ पनि जान्छ

मीठामीठा कुरा गर्छ भाषण चर्कै गर्छ
देखिएन राम्रो काम, धोक्रो आफ्नै भर्छ
शान्ति, सुरक्षाको गफ नथाकेरै गर्छ
मुलुकमा सधै सधै नयाँ चारो छर्छ

नेता बने भाषणले छकाउन खोज्छ
कार्यकर्ता बने भाषा चाकडीका रोज्छ
पद जस्तो भए पनि सेवाभाव छोड्छ
सबै कुरा तराजुमा पैसासँग जोख्छ

आफूलाई सधै ठान्छ शुक्र, गुरु जस्तो
अरूलाई देख्छ, ठान्छ भैँसी, गोरु जस्तो
अलपत्रे कुरा गर्छ, बन्छ हिरो जस्तो !
देखाइमा घगडान, भित्र कस्तो कस्तो !

यो मान्छेको चाल अर्कै रूप अर्कै किन ?
धननिम्ति सबै कुरा त्यागेको छ किन ?
संसारकै श्रेष्ठ प्राणी मै हुँ भन्छ किन ?
आफैलाई ठूलो दावा गर्छ यस्तो किन ?

हाल- काठमाण्डौं ३२ मनोहरवस्ती