हामी सबैकाे संसारन्यूज

१.
सालिकझैँ दोबाटोमा ठडिएर बसेको छु
खुला किताब जस्तैगरि पढेर बसेको छु
अहिलेसम्म यो बिरानो मुलुकमा तिमीबिना,
थाहा छैन खै कसरी अडिएर बसेको छु ?

२.
हिंड्दाहिंड्दै पाइला अन्तै मोडिएर बाँचेको छु
एउटा मुटु दुईतिर जोडिएर बाँचेको छु
मायागर्ने मान्छे साथमा नभैदिदा यस्तो लाग्छ–
आज आफू आफैंबाट छोडिएर बाँचेको छु ।

३.
कुवा जस्तो होइन जीवन, गतिशील खोला हो यो
जे आट्यो त्यही पुर्याइदिने मनचिन्ते झोला हो यो
बोलीसङ्गै व्यवहार गर्दा सधैं सम्झिराख्नु,
अजम्बरी कोही छैन, मरिजाने चोला हो यो ।

४.
धकेलेरै अघि सर्छन, मरिलानु के नै छ र ?
पाइलैपिच्छे काँडा छर्छन, मरिलानु के नै छ र ?
चिताको लास सोच्दैथियो–धनकै लागि मान्छेहरु,
मरिहत्ते किन गर्छन्, मरिलानु के नै छ र ?

५.
अन्धभक्त, लम्पटदास हुँदै गए गणहरु
कुरामात्रै गरि, खेर फाले हरेक क्षणहरु
समृद्धिको दिवास्वप्न देखाउदै निदाएर,
अहिलेसम्म ब्युझिएका छैनन् कुम्भकर्णहरु ।