हामी सबैकाे संसारन्यूज

४ जेठ, नयाँदिल्ली । भारतका विभिन्न क्षेत्रमा करिब २ महिनादेखि क्वारेन्टीनमा रहेर समस्या झेलीरहेका झण्डै ८ सय नेपालीहरूलाई  युवा नेताद्धयको पहलमा नेपाल फिर्ता पठाइएको छ ।

नेपाल सरकार र भारतस्थित नेपाली दूतावास भारतमा रहेका नेपालीहरूका बारेमा मौन रहेका बेला समाजसेवी तथा युवा नेता सन्दीप राना, अखिल भारत नेपाली एकता मंच केंद्रीय सचिब आरबी खड्का र प्रवासी नेपाली एकता मंच भारतका संयोजक लोकनाथ भण्डारी र सहसंयोजक इशरी भण्डारीको बिशेष सहयोगमा बिशेष पहलमा भारतका विभिन्न क्षेत्रमा करिब २ महिनाको क्वारेन्टिनमा रहेका नेपालीहरुलाई स्वदेश फिर्ता पठाइएको हो ।

उत्तर प्रदेशको रामपुरदेखि गौरीफण्टासम्म विभिन्न क्वारेन्टिनमा रहेका करिब ८०० जनालाई शुक्रबार र शनिबार नेपाल फिर्ता पठाइएको हो । उनिहरुको सूचि तयार गरिएपछि जोगबनी, सुनौली, नौतुनवा र गौरीफण्टा लगायतका नाकाबाट नेपाल पठाइएको बताइएको छ ।

भारतमा जारी लकडाउन र नेपालको सीमा बन्द भएकाले उनिहरु २ महिनादेखि क्वारेन्टीन बस्न बाध्य भएका थिए । क्वारेन्टीन अवधि पूरा गरेपछि पनि सेवा सुविधा बिना शिविरमै बस्नु परेकाले युवा नेताहरु सन्दीप राना र आर.बी. खड्काले उनिहरुको गृह जिल्ला, नगरपालिका र वडामा सर्वदलीय बैठकद्वारा सहमति गराएर नेपाल फर्काउने वातावरण बनाएका हुन् । घर फर्किन पाएका उनिहरुले खुशी व्यक्त गर्दै सहयोगी सबैप्रति आभार व्यक्त गरेका छन् ।

‘उनीहरुलाई नेपाल फर्काउन लामो समयदेखि प्रयास गरिरहेका थियौँ, अन्ततः उत्तर प्रदेशका मुख्यमन्त्री योगी आदित्यनाथ, उनीहरु रहेको जिल्लामा डी.एम., एस.पी. र एडी.एम.(को सहयोग तथा कर्णाली प्रदेश र सुदूरपश्चिम प्रदेशका विभिन्न जिल्लाका प्रतिनिधि, स्थानिय प्रतिनिधि अनि सर्वदलीय प्रयासले नेपाल फर्काउन सफल भयौँ ।’ उनिहरुलाई नेपाल पुगेपछि स्वास्थ्य परीक्षणपछि क्वारेन्टीनमा बस्नु पर्ने पनि खड्काले जानकारी दिए ।

खड्काका अनुसार उत्तर प्रदेशको रामपुरदेखि गौरीफण्टासम्म विभिन्न क्वारेन्टीनमा रहेकाहरुलाई सुरक्षित सीमासम्म पुग्न रामपुरका डी.एम. आंजनेय कुमार सिंह, खीमपुर खीरीका डी.एम. शैलेन्द्र कुमार सिंह र एस.पी. पूनमले ठूलो सहयोग गरेका थिए ।

त्यसैगरि जे.एन.यू. स्कोलर अम्बिका जोशी, विद्यार्थी नेता सुधन महत, समाजसेवी दीपक जी.सी. को पनि महत्वपूर्ण सहयोग रहेको थियो ।

प्रदेश सरकार र दिल्लीस्थित दूतावासलाई जानकारी हुनेगरि नेपालीहरुलाई फिर्ता पठाइएको खड्काले बताएका छन् । भारतमा समस्यामा परेका नेपालीहरुलाई फिर्ता लग्नेबारे संघीय स्तरमा कुनै निर्णय नभएको र प्रदेश सरकारले पनि खासै चासो नदिएका बेला स्थानिय जनप्रतिनिधिहरुको समन्वयमा उनिहरुलाई फिर्ता लग्ने काम भइरहेको छ । त्यसका लागि भारतमा रहेका विभिन्न संगठनहरुले निरन्तर दवाव दिइरहेका छन् । दिल्ली एन.सी.आर.मा विभिन्न क्वारेन्टीनमा बसेका नेपालीहरुलाई स्थानिय प्रशासनसँग समन्वय गरि नेपाल फिर्ता पठाउने तयारीहरु भइरहेको पनि खड्काले बताएका छन् ।

यसअघि युवा नेता सन्दीप राना र आर.बी. खड्काको पहलमा आनन्द बिहारमा फसेका सयौँ नेपालीहरुलाई पनि नेपाल पठाउने काम भएको थियो । दुबै जना युवाको नेतृत्व पहल हजारौको सँख्यामा अलपत्र परेका नेपालीहरूलाई राहत सहयोग गर्दै आएका छन् ।