हामी सबैकाे संसारन्यूज

६ जेठ, काठमाडौँ । राष्ट्रवादी र स्वाभिमानी नेता भनेर हाइहाइ खाने गरेका प्रधानमन्त्री तथा सत्तारुढ दल नेकपाका अध्यक्ष केपी शर्मा ओलीलाई छलि गरेको आरोप लगाइएको छ ।

नेपाल कम्युनिष्ट पार्टी(नेकपा)का एक सचिवालय सदस्यले प्रधानमन्त्री ओली ढाँट– छल गरेरै शासन चलाइरहेको आरोप लगाएका छन् ।
कारोना महामारीले मुलुक थप प्रताडित बनाएको बेला प्रधानमन्त्री ओलीले नीति तथा कार्यक्रम पुरै तयार पारी सचिवालय बैठक बोलाइएको र ‘बेला यस्तो छ’ भन्दै सरकारको कार्यक्रमलाई आँखा चिम्लेर सहयोग गर्न प्रस्ताव गरिएको पनि उनले जनाएका छन् ।

प्रधानमन्त्री ओलीले नीति तथा कार्यक्रमको शारांस सुनाउँदै समर्थनको प्रस्ताव गरिरहँदा सचिवालयमा सीमा सम्बन्धी कुरा ठोस रुपमा उल्लेख गर्नुपर्ने, नक्सा सार्वजनिक गर्ने प्रतिबद्धता आउनु पर्ने र जतिसक्दो छिटो नक्सा सार्वजनिक हुनुपर्ने कुरा बोलिनु पर्ने विषय उठाइएको थियो । नेकपाको एक स्रोतले संसारन्यूजसँग भन्यो ‘सचिवालयमा ती कुरा नपुगेको भए यो विषय प्राथमिकतामा पर्दैनथ्यो ।’

पार्टी प्रक्रिया र पद्धतिलाई मिचेर खोपिभित्रका बदनामी व्यक्तिहरुको उक्साहटमा शासन चलाइरहेको आरोप खेपेका प्रधानमन्त्री ओलीले पुरै तयारी गरेपछि सचिवालयको बैठक बोलाउँदा पढ्ने, हेर्ने र सुझाव दिने वातावरण खासै नरहेको भनि वरिष्ठ नेताहरु आक्रोशित भएका थिए । तर सीमा र नक्सा सम्बन्धी कुरो कार्यक्रममा परेको र नक्सा सार्वजनिक भैसकेको स्थितिमा ‘ओलिको घटेको कद उठिसकेको’ छ । यद्धपी नेकपा उच्च स्रोतले ‘ढोंगी राष्ट्रवाद’ एक्लै हुँदा अराजकतामा पुग्छ र समूहमा पर्दा नियन्त्रीत हुन्छ भन्दै ओलीको नियतमा खोट थिएन भन्ने ठाउँ नरहेको बताएको छ ।

पार्टीलाई थाहै नदिइ दल फुटाउने अध्यादेश ल्याइएको, समाजवादीका सांसदहरु काठमाडौँ ल्याउन लकडाउन उल्लंघन गरिएको, पार्टीको विधि, नीति र पद्धती भनेकै आफ्नो मनोमौजीका रुपमा देखाइएको जस्ता तर्क सचिवालय बैठकमा उठेका थिए । चलाख प्रधानमन्त्रीले वामदेवलाई नयाँ ढंगले थुम्थुम्याएर र बादललाई ‘पानी नपार्ने बनाएर’ सचिवालय बैठक आयोजना गरेपछि उनले ‘अब आइन्दा पार्टी पद्धती मान्छु भनेर आत्मालोचना गरेको’ पनि सार्वजनिक भएको थियो ।

तर सो बैठकको १ हप्ता नबित्दै ओलीले आफ्नो पुरानो पारा देखाइहालेको विश्लेषण नीति तथा कार्यक्रममा प्रत्यक्ष अनुभूत भयो । ओलीले एमसीसीको बुँदा मज्जैसँग छिराइदिए । ‘लप्सीफेदी–रातमाटे–हेटौंडा र लप्सीफेदी–रातमाटे–दमौली बुटबल ४ सय केभी प्रसारण लाइन निर्माण कार्य अघि बढाउनुपर्ने’ विषय त्यहाँ उल्लेख गरियो, जुन कुरो एमसीसीको प्रस्तावमा प्रष्टै रहेको छ ।

‘सरकार कस्ले चलाएको छ ? पार्टीले चलाएको भए त पार्टीको प्रतिवेदन अनुरुप हुन सक्नु पर्दथ्यो ?’ यो प्रश्न नेकपामा जब्बर उठेको छ । नक्साको हल्लाले एमसीसीको मौन कार्यान्वयन सहज हुने अनुभूति प्रधानमन्त्रीले गरेको हुनुपर्दछ । नीति तथा कार्यक्रममा रहेको उक्त वाक्यांशका बारेमा पहिलो विरोध संसदमै नरहेका प्रभावशाली स्थायी समिति सदस्य लीलामणि पोखरेलले सञ्जालमार्फत गरेका थिए ।

एमसीसीका बारेमा गत माघ १९ गते नेकपाले बनाएको कार्यदलका संयोजक झलनाथ खनाल र सदस्यहरु भीम रावल तथा प्रदिप ज्ञवाली मध्ये संयोजक झलनाथ खानाल र भीम रावलले कार्यदलको प्रतिवेदनमा राखिएको कतिपय बुँदा ‘संसोधन र परिमार्जन नगरी पास गर्नै नहुने’ कुरा स्मरण गराउँदै प्रधानमन्त्री, पार्टी अध्यक्ष, सचिवलाय र स्थायी समितिलाई समेत बोधार्थ दिएर पत्र नै पठाइसकेका छन् । नेकपाकै केन्द्रीय सदस्य नारायण शर्माले एमसीसी खारेज अभियानमार्फत सभामुख र सांसदहरुलाई एसएमएस अभियान चलाएका छन् भने देव गुरुङ, स्वनाम साथी, जगन्नाथ खतिवडा लगायतका नेताहरुले एमसीसीको राष्ट्रघात सह्य हुनै नसक्ने बताएका छन् ।

नेकपाभित्र एमसीसीको पक्षमा निकै सानो मत भएपनि नेपाली काँग्रेस र प्रतिपक्षि नेता शेरबहादुर देउवा लगायतले प्रधानमन्त्री ओलीलाई यस विषयमा भने प्रत्यक्षै साथ दिएका छन् । ओली कुनै हालतमा एमसिसि पास गराउने तयारीमा छन ।

फाइल तस्विर