हामी सबैकाे संसारन्यूज

१२ जेठ, काठमाण्डौं । प्रधानमन्त्री केपी शर्मा ओलीले इद पर्वको अवसरमा इस्लाम समुदायका शुभकामना व्यक्त गर्दै इद पर्व सबै नेपालीको मौलिक पुँजी रहेको बताएका छन् ।

प्रधानमन्त्री ओलीले बहुधार्मिक, बहुजातीय र बहुसांस्कृतिक विशेषतायुक्त सुन्दर देश नेपालमा यस्ता पर्व र विशेषता यहाँ मौलिक पूँजीका रुपमा रहेको बताउँदै एकता र सहिष्णुताको यस पूँजीलाई समृद्ध देश निर्माणमा सदुपयोग गर्नुपर्ने समेत बताएका छन् ।

विभिन्न धार्मिक तथा सांस्कृतिक आस्थाहरु मुलुकमा सम्मानित र संरक्षित भएको बताउँदै प्रधानमन्त्रीले लोकतन्त्र, सामाजिक न्याय, राष्ट्रिय एकता, स्वाधीनता, राष्ट्रिय अखण्डता र देशभक्तिलाई केन्द्रमा राख्दै कायम गरिने अक्षुण्ण एकता, सद्भाव र सहिष्णुता हाम्रो राष्ट्रिय विशेषता भएको समेत उल्लेख गरेका छन् ।
प्रधानमन्त्री ओलीले विश्वव्यापी महामारीका रुपमा फैलिएको कोभिड-१९ को प्रकोपबाट बच्न विशेष सतर्कता अपनाउँदै इद उल फित्र मनाउन आग्रह समेत गरेका छन् ।