हामी सबैकाे संसारन्यूज

१२ जेठ, काठमाडौँ । नेपाली काँग्रेस नुवाकोटका सभापति जगदीश्वरनरसिंह केसीले संक्रमितको सिंगो गाउँ सिल गर्न सरकारसँग आग्रह गरेका छन् ।

आईतबार नुवाकोटको ककनी गाउँपालिका वडा नम्वर ३ का एक ३९ बर्षिय पुरुषमा कोराना संक्रमणको पुष्टि भएसँगै नागरिकमा भय फैलिएको भन्दै प्रेस बिज्ञप्ती जारी गरी उनले सो आग्रह गरेका हुन् ।

संक्रमित ब्यक्ति राजनीतिक ब्यक्ति समेत भएको र उनको जनसम्पर्कको अवस्थालाई हेर्दा संक्रमितको सिंगो गाउँ नै सिल गरेर सबै नागरिकको परीक्षण गराई आम नागरिकलाई भयमुक्त बनाउन माग गरेका छन् ।

उनीसँग सम्पर्कमा आएका ककनि १, २ र ३ वडा समेत संक्रमितको सम्पर्कमा आएकाहरुको कन्ट्याक्ट ट्रेसिङ गरी उनीहरुको तत्काल पिसिआर बिधिबाट परीक्षण गराउन माग पनि गरिएको छ ।

संक्रमितलाई अस्पताल लैजान तत्काल एम्बुलेन्स समेत नपाईएको तथ्यले सरकार र स्थानीय तहहरुको तयारीको कमजोर अवस्थालाई समेत उजागर गरेको भन्दै नारा र गफमा मात्र तयारी नदेखाई कोरोना संक्रमण रोकथाम र नियन्त्रणका कामलाई प्रभावकारी बनाउनसमेत आग्रह गरिएको छ ।

साथै जिल्लामा कोरोना संक्रमण रोकथाम र नियन्त्रणका लागि भइरहेका प्रयासहरुलाई अझै प्रभावकारी बनाउन पनि माग गरिएको छ ।

यस्तो छ, विज्ञप्तीको पूर्ण पाठ :

प्रेस बिज्ञप्ती
मिति ः २०७७।०२।१२
आईतबार नुवाकोट को ककनी गाउँपालिका वडा नम्वर ३ का एक ३९ बर्षिय पुरुषमा कोराना संक्रमण भएको स्वास्थ्य तथा जनसंख्या मन्त्रालयले पुष्टि गरिसकेको अवस्थामा जिल्लामा कोरोना संक्रमण रोकथाम र नियन्त्रणका लागि भइरहेका प्रयासहरुलाई अझै प्रभावकारी बनाउनुपर्ने देखिएको छ ।ककनीको वडा नम्वर ३ मा संक्रमित भेटिएसंगै अव ककनि १,२ र ३ वडा समेत संक्रमितको सम्पर्कमा आएकाहरुको कन्ट्याक्ट ट्रेसिङ गरी उनीहरुको तत्काल पिसिआर बिधिबाट परीक्षण गराउनु अहिलेको प्रमुख आवश्यकता हो । यसका साथै संक्रमित ब्यक्ति राजनीतिक ब्यक्ति समेत भएको र उनको जनसम्पर्कको अवस्थालाई हेर्दा संक्रमितको सिंगो गाउँ नै सिल गरेर सबै नागरिकको परीक्षण गराई आम नागरिकलाई भयमुक्त बनाउन समेत नेपाली काँग्रेस सरकारसंग माग गर्दछ ।
अहिले मुलुक लकडाउनको अवस्थामा छ सबै मिलेर कोरोना संक्रमण रोकथामको प्रयत्न भईरहेको छ । तर आईतबार संक्रमितलाई अस्पताल लैजान तत्काल एम्बुलेन्स समेत नपाईएको तथ्यले सरकार र स्थानीय तहहरुको तयारीको कमजोर अवस्थालाई समेत उजागर गरेको छ । तसर्थ नारा र गफमा मात्र तयारी नदेखाई कोरोना संक्रमण रोकथाम र नियन्त्रणका कामलाई प्रभावकारी बनाउन समेत हामी सम्बद्ध पक्षसंग जोडदार माग गर्दछौं । साथै कोरोना संक्रमण रोकथामका लागि अपनाईएको लकडाउन लगायतका उपायहरुको पूर्ण कार्यान्वयन गरी सुरक्षित रहन आम नागरिकमा अपिलका साथ संक्रमित ब्यक्तिको सिघ्र स्वास्थ्य लाभको कामना समेत गर्दछौं ।
जय नेपाल
जगदीश्वरनरसिंह केसी
सभापति
नेपाली काँग्रेस नुवाकोट