हामी सबैकाे संसारन्यूज

अँध्यारो कोठामा
देखेपछि कमरेडको चर्तिकला
कमरेडले बोकेको झण्डाबाट
हँसिया फुत्त झर्यो र भन्यो-
‘भो मलाई अपराधको साँक्षी बस्नु छैन !’

उज्यालो वैठक कक्षमा
कमरेड मस्किएको देखेपछि
देशको सबैभन्दा भ्रष्ट अरवपतीसँग
कमरेडले बोकेको झण्डाबाट
फुत्त हथौडा झर्यो र भन्यो-
‘भो मलाई पूँजीपतिको गोठालो बस्नु छैन !’

कमरेडको बाकसमा देखेपछि
सरकारी जमीनको लालपूर्जा
कमरेडले बोकेको झण्डाबाट
फुत्त रातो रङ्ग झर्यो र भन्यो-
‘लाल पूर्जा भए पुग्ने रैछ
अव किन चाहियो र म ?’

हँसिया हथौडा र रातो रङ्ग
क्रमशः भागेपछि झण्डाबाट
एक दिनको कुरा हो
कमरेडको हातबाट
फुत्त झर्यो झण्डा
र कमरेडको हात रित्तै भयो !

त्यसपछि कमरेडसँग
अचेल कुनै झण्डा छैन
झण्डा विनाका कमरेड
क्या साह्रो झल्ला देखिएका, हैट !