हामी सबैकाे संसारन्यूज

१३ असार, काठमाडौँ । शनिबार बिहान सलह कीरा नेपालका केही जिल्लाहरुमा प्रवेश गरेपछि कोरोना भाइरसको भन्दा बढी त्रास फैलिएको छ ।

बारा, पर्सा, सिन्धुली, सर्लाली, रुपन्देही लगायतका जिल्लाहरुमा सलह कीरा प्रवेश गरेपछि कृषि तथा पशुपन्छी विकास मन्त्रालयले सलह कीराको संख्या, अवस्था, फैलावट, क्षतिको आँकलन लगायतका बिषयमा जानकारी लिन संघीय निकायहरू र प्रदेश अन्तरगतका प्राबिधिकहरू परिचालित भैसकेको जनाएको छ ।

मन्त्रालयका प्रवत्ता डा हरिबहादुर केसीद्वारा जारी विज्ञप्तीमा प्राबिधिकहरूको सम्पर्क र समन्वयमा रही यस कीराको ब्यवस्थापनमा सकृय रहन तीनै तहका सरकारका सम्बन्धित निकायहरुसँग अनुरोध गरिएको छ ।

यो कीरा लामो सयमदेखि भारतका विभिन्न स्थानमा देखिएकोले नेपालमा पनि यसको प्रवेशलाई दृष्टिगतगरी सोको अध्ययन गरी आवश्यक तयारीका लागि प्राविधिक कार्यदल गठन गरेको जानकारी गराउँदै मन्त्रालयले यसबीचमा विश्व खाद्य तथा कृषि संगठनका विज्ञहरुसँग परामर्श गरी सलहका सम्बन्धमा प्राविधिक जानकारी तयारी गरी प्रकाशन गरी प्रचारप्रसार गरिएको उल्लेख छ ।

जल तथा मौसम विज्ञान विभागसँग पनि निरन्तर समन्वयमा रही यस कीराको सम्भावित प्रवेशका सम्बन्धमा अनुगमन गरिराखिएको पनि विज्ञप्तीमा जनाइएको छ ।