हामी सबैकाे संसारन्यूज

१९ असार, काठमाण्डौं । गुल्मीको ईश्मा १ को नल्झीमा बिहिबार राति गएको पहिरोका कारण २ जना बेपत्ता भएका छन् भने १ को उद्धार गरिएको छ ।

मध्राति आएको वर्षासँगै गएको पहिरोले त्यहाँका १२ घर परिवार विस्थापित भएका छन् भने बाटोहरु अवरुद्ध भएका कारण उद्धारमा कठिनाई भइरहेको इश्मा गाउँपालिकाका अध्यक्ष लक्ष्मण बहादुर विष्टले संसारन्युजलाई जानकारी दिएका छन् ।

विष्टका अनुसार विहिबार रातिदेखि आएको अविरल बर्षाका कारण राति २ बजेदेखि पहिरो जान सुरु भएको हो ।

‘वरिपरीबाट पहिरो गएकाले बाटो अवरुद्ध भएको छ । त्यहाँ जान सकिएको छैन हिलो माटो र लेदो बगिरहेको छ । प्रहरी र सेनाको टोली उद्धार कार्यका लागि गइरहेका छन्’ अध्यक्ष विष्टले भने, ‘यति जना परेका छन् भन्ने यकिन भन्न सकिएको छैन, एकजना ४१ वर्षीया महिलाको भने स्थानीयको सहयोगमा उद्धार भएको छ ।’

तल फाँटमा बस्ति रहेको र माथि भिरालो जमिन रहेकाले माथिबाट खसेको पहिरोले १२ घर बस्नै नमिल्ने गरी क्षति भएको बताइएको छ ।
फाँटमा रहेका होटल लगायतका घरहरु पुरिएको तथा खोलाले बगाएको छ । हाल नेपाली सेना र प्रहरीको टोली उद्धारका लागि खटिएका छन् ।

फाइल : फोटो