हामी सबैकाे संसारन्यूज

३० असार, काठमाडौं । नेपाल उद्योग वाणिज्य महासंघको आसन्न चुनावका लागि महासंघको बरिष्ठ उपाध्यक्ष पदमा वर्तमान कार्य समितिका उपाध्यक्ष चन्द्र प्रसाद ढकालले उम्मेदवारी दिएका छन् । बुधबार एक कार्यक्रमको आयोजना गरी ढकालले महासंघको बरिष्ठ उपाध्यक्ष पदमा उम्मेद्वारी दिएका हुन् । उक्त कार्यक्रममा ढकाल समुहले प्यानल नै घोषणा गरेको छ ।

को को छन त ढकाल प्यानलमा ?

ढकाल समूहबाट अर्का उपाध्यक्षका लागि गुणनिधी तिवारीले उम्मेद्वारी दिएका छन भने वस्तुगत संघ समूहबाट उपाध्यक्षका लागि उमेशलाल श्रेष्ठले उम्मेद्वारी घोषणा गरेका छन् । त्यस्तै एशोसिएट सदस्य समूहको उपाध्यक्षका लागि रामचन्द्र संघाईले उम्मेद्वारी घोषणा गरेका छन् ।

उम्मेद्वारी घोषणा कार्यक्रममा बोल्दै बरिष्ठ उपाध्यक्षका दावेदार ढकालले केही महिना अघिसम्म महासंघको नेतृत्वमा बसेका अधिकांश साथीहरुले वरिष्ठ उपाध्यक्ष स्वतः अध्यक्ष हुने प्रावधान हटाउनुपर्छ भन्दा त्यो प्रावधान हटाउनु हुँदैन भनेर आँफुले एक्लै लविङ गरेको बताए ।

पछि के हुन्छ हामीले हेरौंला तर अहिले वरिष्ठ उपाध्यक्ष शेखर गोल्छाजीले नै महासंघको भावी नेतृत्व पाउनुपर्छ भनेर ठूलै मेहनत नगरेको भए आज परिस्थिति अर्कै हुन्थ्यो भन्दै ढकालले गोल्छाको समर्थन पनि आफूलाई नै हुने विश्वास ब्यक्त गरे ।

आईएई ग्रुपको अध्यक्ष समेत रहेका ढकाल हाल महासंघको उपाध्यक्ष छन । उनको समूहले मंगलबार चुनावी घोषणा सभाको आयोजना गरेर आफ्नो प्यानल विजयी हुने दावी गरेका छ।