हामी सबैकाे संसारन्यूज

काठमाडौं । खाना पकाउने एलपी ग्यासको चरम अभाव भइरहेका बेला ग्यास विक्रेता महासङ्घ नेपालले उद्योग तथा विभिन्न नामका बिक्री केन्द्रबाट हुँदै आएको प्रत्यक्ष ग्यास बिक्री तत्काल रोक्न सरकारसँग माग गरेको छ । महासङ्घका अध्यक्ष ज्ञानेश्वर अर्यालले प्रभावकारी वितरण प्रणाली (विक्रेतारडिलर) लाई पन्छाएर उद्योग र विभिन्न केन्द्रमार्फत आफैँ ग्यास बेच्ने निर्णयले अभावलाई झन् जटिल बनाएको र उपभोक्ताले अनावश्यक सास्ती खेप्नुपरेको बताउँदै त्यस्तो अभ्यास तत्काल बन्द गर्न माग गरेका हुन् ।

एकातिर विक्रेतालाई ग्यास नदिने र अर्कातिर अनुगमनको बहानामा दुःख दिने सरकारी रवैयाका कारण बजार भद्रगोल बनेको महासङ्घको ठहर छ । महासङ्घद्वारा जारी विज्ञप्तिमा भनिएको छ, ‘सरकार, उद्योग र बिक्री केन्द्रका नामबाट आफैँ ग्यास बिक्री गर्ने तथा अनुगमनका नाममा आम विक्रेतालाई अनावश्यक दुःख दिने सरकारी रवैयाप्रति ग्यास विक्रेता महासङ्घ घोर आपत्ति प्रकट गर्दछ ।’

महासङ्घले तत्काल ग्यास उद्योग र विभिन्न नामका बिक्री केन्द्रहरू बन्द गरी विक्रेतामार्फत मात्र बिक्री९वितरण सहज बनाउन सरकारको ध्यानाकर्षण गराएको छ । डिलरमार्फत वितरण प्रणाली व्यवस्थित गरे मात्र उपभोक्ताले भोगिरहेको सास्ती अन्त्य हुने र वास्तविक समस्या समाधान हुने महासङ्घको दाबी छ । यसका साथै विगत चार महिनामा करिब ६० हजार टन ग्यास कम आयात भएको तथ्याङ्क पनि महासङ्घले सार्वजनिक गरेको छ ।

बजारमा आवश्यकताभन्दा बढी (करिब ८० लाख) नयाँ सिलिन्डर छरिएकाले अहिलेको स्थिति सिर्जना भएको विज्ञप्तिमा उल्लेख छ । अहिले पनि नयाँ सिलिन्डर बिक्री नरोकिएको भन्दै महासङ्घले यसलाई तत्काल नियन्त्रण नगरिए आगामी वर्षहरूमा ग्यास अभावको समस्या झन् विकराल बन्ने चेतावनी दिएको छ । सम्बन्धित निकाय नेपाल आयल निगम, वाणिज्य मन्त्रालय र सरकारले वास्तविक समस्या समाधान गर्नुको सट्टा अनावश्यक प्रचारबाजी मात्र गरिरहेको महासङ्घको आरोप छ ।