Sansar News
४ साउन, काठमाण्डौं । विश्वव्यापी फैलिएको कोरोना महामारीले नेपालमा पनि झण्डै १८ हजार जनालाई संक्रमित बनाएको छ । कोरोना संक्रमणबाट स्वास्थ्य तथा सुरक्षा क्षेत्रका व्यक्तिहरु पनि बढी प्रभावित भएका छन् ।
प्रहरी प्रधान कार्यालयका अनुसार हालसम्म देशैभरीका विभिन्न जिल्लामा कार्यरत पाँच इन्सपेक्टरसहित १०५ जना संक्रमित भएका छन् । तर, संक्रमितहरु निको हुने क्रम पनि बढिरहेको छ । १०५ जनामा ८२ जना निको भएर डिस्चार्ज भइसकेको पनि कार्यालयले जानकारी दिएको छ ।
कार्यालयका अनुसार संक्रमित हुनेमा पाँच इन्स्पेक्टरसहित ७ जना सई, ७ जना असई, ३१ जना हवल्दार, ५४ जना प्रहरी जवान र एकजना कार्यालय सहयोगी रहेका छन् । उनीहरुमा महिलाको संख्या २ रहेको छ भने १०३ पुरुष रहेका छन् ।
प्रहरीका अनुसार प्रदेश नं १ को धनकुटामा २ जनारहेका छन् । प्रदेश नं २ मा सबैभन्दा बढीमा संक्रमित देखिएको छ । जसमा धनुषामा १०, बारामा ७, सप्तरीमा ४, रौतहटमा ४, सिराहामा ३ र महोत्तरी र सर्लाहीमा २/२ जना गरी ३२ जनामा संक्रमण पुष्टि भएको छ ।
बाग्मती प्रदेशमा काठमाण्डौंमा ८ र भक्तपुरमा १ जना गरी ९ जना । गण्डकी प्रदेशमा नवलपरासीमा ५, तनहुँमा २ र बाग्लुङमा १ गरी ८ जना ।
प्रदेश ५ का ६ जिल्लामा १३ जना संक्रमित भएका छन् । जसमा कपिलवस्तुमा ६, प्युठान, दाङ, बाँके र बर्दियामा २÷२ जना र गुल्मीमा १, जना गरी १३ जना संक्रमित भएका हुन् ।
त्यस्तै कर्णाली प्रदेशमा सबैभन्दा ३१ जनामा संक्रमण देखिएको हो । जसमा दैलेखमा १४, सुर्खेतमा ८, कञ्चनपुरका ४, जुम्लामा २, डोल्पामा २ र जाजरकोटमा १ जना रहेका छन् ।
त्यसैगरी सुदूरपश्चिम प्रदेशको बाजुरामा ६ र अछाममा २ जना गरी जम्मा ८ जनामा संक्रमण पुष्टि भएको हो ।
वि.सं.२०७७ साउन ४ आइतवार १५:३८ मा प्रकाशित
