हामी सबैकाे संसारन्यूज

कतै घरका खोपामा
कतै रुखका टोड्कामा
कतै बनस्पतिका हाँगामा
पस्दै
निस्कने माहुरी
मसिना पखेटा हल्लाउदै
हुरुरु उडेर आउछन्
शरिर नचाउदै फूलमाथि बस्छन्
उड्छन
उष्ण तातोमा
चमरले हावा हम्किए झै
पखेटा हल्लाउँदै फूलमा सुँढ घुसार्छन
परन्तु
असन्तुष्टिको उच्छवास छोड्दैन फूल
छेउमा उभिएर हेर्दा
कामुक लाग्दैनन् माहुरी
परन्तु मुहुनी लाउन छोड्दैन फूल
सत्य हो
घाम र बादल लुकामारी खेल्दा
फूलहरू झुलिरहेका हुन्छन्
मन्दमन्द हावामा
माहुरीहरू यता उड्छन् उता उड्छन्
जता पुगेपनि
अन्ततः
फूलका पत्रमा नै घोप्टिन्छन्
यस्तै छ प्रकृति
हावा वा माहुरीले पराग खसाएर
गर्भिणी हुन्छे फूल
परन्तु
सुनिदैन फूलका सुस्केरा
देखिदैन फुलका व्यथा
बस !
जति देखिन्छ
फूलले घेरिएका बगैंचामा
फूलका पत्रपत्रमा
घोप्टिएका माहुरीमात्र देखिन्छ
फूल झरेका हाँगाहरूमा
फूलका भ्रुणमात्र देखिन्छ !
।