हामी सबैकाे संसारन्यूज

काठमाडौं । सत्तारुढ दल नेपाल कम्युनिष्ट पार्टी (नेकपा)भित्रको विवादको विषयमा पार्टी अध्यक्षद्वय केपी शर्मा ओली र पुष्पकमल दाहाल ‘प्रचण्ड’बीच छलफल भएको छ ।

स्थायी कमिटी बैठक अन्तिम समय ओलीले एकपक्षीय रुपमा स्थगित गराएसँगै चर्किएको विवादका विषयमा अध्यक्षद्वयबीच छलफल भएको हो । बालुवाटारमा जारी छलफलमा पार्टीका वरिष्ठ नेता झलनाथ खनाल र महासचिव विष्णु पौडेल पनि सहभागी भएको जनाइएको छ ।

नेकपाका एक स्थायी समिति सदस्यले जनाएअनुसार ओली इतरका नेताहरुले बैठक राख्नुपर्ने अडान राखेपछि प्रचण्ड खनाललाई लिएर ओलीलाई भेट्न पुगेका हुन् ।

आज ११ बजेको लागि स्थायी समिति बैठक बोलाइएको थियो । बहुमत सदस्यहरुको बैठकस्थलमा उपस्थित भएपनि ओलीले एकलौटी रुपमा बैठक स्थगनको निर्णय गरेका थिए ।

यसैबीच बाँकी रणनीति बनाउन पार्टीका वरिष्ठ नेता माधवकुमार नेपाल र वामदेव गौतमबीच पनि बेग्लै छलफल भएको छ । पछिल्लो विवादमा निकास खोज्न दुई नेताबीच छलफल भएको निकट स्रोतले जनाएको छ ।

स्थायी समिति बैठक स्थगनको निर्णयसँगै उपाध्यक्षसमेत रहेका नेता गौतमले विवादको समाधानको लागि भन्दै ६ बुँदे प्रस्ताव अघि सारेका थिए । उनले महाधिवेशनसम्मको लागि पुरै कार्यकाल ओलीले प्रधानमन्त्रीको जिम्मेवारी लिने र प्रचण्डले कार्यकारी अध्यक्षको जिम्मेवारी लिने गरि सहमती खोजिनुपर्ने बताएका थिए ।