हामी सबैकाे संसारन्यूज

काठमाडौं । आन्तरिक गतिरोध हल गर्न भन्दै नेकपा अध्यक्षद्वय केपी शर्मा ओली र पुष्पकमल दाहाल ‘प्रचण्ड’बीच भएको वार्ता सकिएको छ । सोमबार बिहान बालुवाटारमा भएको वार्ता पुनः छलफलमा बस्ने सहमती सहित सकिएको नेकपा स्रोतले जनाएको छ ।

‘छलफल भयो, त्यसैलाई सकारात्मक भनौं, भोली फेरि छलफल हुने सहमती भएको छ’ ओली–दाहाल वार्तामा सहभागी एक नेताले भने, ‘आजको छलफललाई निरन्तरताको रुपमा बुझ्न सकिन्छ ।’

उनका अनुसार स्थायी समिति बैठक बस्ने नबस्ने विषय भने झनै अनिश्चित बनेको छ । दुवै नेताहरु आ–आफ्नै अडानमा अडिग देखिएका छन् । जनाइएअनुसार छलफलमा ओलीले सचिवालय बैठक बोलाएर सहमती खोज्नुपर्ने प्रस्ताव राखेका थिए भने दाहालले स्थायी समितिबाटै सहमती खोज्नुपर्ने प्रस्ताव राखेका थिए । छलफलमा दाहालले स्थायी समिति बैठकलाई अनिश्चित गराउन नहुने तर्क राखेका थिए ।

प्रधानमन्त्री निवास बालुवाटार बसेको बैठकमा अध्यक्षद्वयसँगै पार्टी वरिष्ठ नेता झलनाथ खनाल र नेता सुवाचन्द्र नेमाङ्गको पनि सहभागिता थियो । यसअघि आइतबार भएको छलफलमा पनि खनाल र नेमाङ्ग सहभागी थिए ।

गत असार १० देखि जारी नेकपा स्थायी समिति बैठक आन्तरिक विवादकै कारण पटक–पटक स्थगित हुँदै आएको छ । पछिल्लो समय गत साउन १३ मा बोलाइएको बैठक ओलीले स्थगित गर्ने र दाहालले सञ्चालन गर्ने गरेसँगै नेकपाभित्रको आन्तरिक विवाद झनै चुलिदैं गएको छ ।

गत साउन १३ मा प्रचण्डले एकल बैठक राखेसँगै दुई अध्यक्षबीचको तिक्तता उत्कर्षमा पुगेको थियो । त्यसयता दुई अध्यक्षबीच संवादसमेत हुन सकेको थिएन ।