Sansar News
२१ साउन, खोटाङ । अध्यक्ष र उपाध्यक्ष मोटरसाइकल चलाउन नजान्ने भएपछि खोटाङको बराहपोखरी गाउँपालिकाले चालक राखेको छ ।
चारपांग्रे सवारीसाधनका लागि मात्रै चालक राख्न पाउने नियमावली बनाएको भए पनि बराहपोखरी गाउँपालिकाले दुईपांग्रेका लागि पनि तीनजना चालक राखेर तलब खुवाउँदै आएको छ ।
बराहपोखरी गाउँपालिकाले १७ वटा मटरसाईकल किनेको छ । जसमध्ये दुईवटा मोटरसाइकल अध्यक्ष र उपाध्यक्षका लागि छुट्याएको छ । अन्य मोटरसाइकल प्रमुख प्रशासकीय अधिकृतसहित कर्मचारी र वडा कार्यलयले प्रयोग गर्दै आएका छन् ।
अध्यक्ष शालिग्राम बञ्जरा र उपाध्यक्ष गोमा मगरका लागि दुईवटा मोटरसाइकल र चालक तोकिएको छ भने एकजना चालक प्रमुख प्रशासकीय अधिकृत र अन्य कर्मचारीका लागि नियुक्त गरिएको बुधबारको नयाँपत्रिका दैनिकमा समाचार छ ।
गाउँपालिका अध्यक्ष बञ्जरा कांग्रेसबाट र उपाध्यक्ष मगर तत्कालीन नेकपा (एमाले) बाट निर्वाचित भएका हुन् । गाउँसभाले बनाएको कर्मचारी नियुक्तसम्बन्धि नियमावलिको प्राविधिक कर्मचारी नियुक्तसम्बन्धी व्यावस्था गाउँपालिकाले ह्याभी र हलुका सवारी साधन चलाउन मात्रै चालक राख्न सक्ने उल्लेख छ । तर, गाउँपालिकाले भने अध्यक्ष र उपाध्यक्षको मोटरसाइकल चलाउनको लागी चालक राखेको हो ।
स्थानीय सेवन राई, खेमराज दाहाल र कैलाश दाहाललाई हलुका सवारीचालकको नियुक्ति पत्र दिएर निजी सहायक चालकको रुपमा नियुक्त गरिएको गाउँपालिकाले जनाएको छ ।
वि.सं.२०७७ साउन २१ बुधवार १०:०७ मा प्रकाशित
