हामी सबैकाे संसारन्यूज

२५ साउन । नेपाल विद्युत प्राधिकरणका कर्मचारीहरुलाई छुट्टै आइसोलेसन कक्षको व्यवस्था गरी उपचारको व्यवस्था मिलाउन माग गरिएको छ ।

नेपाल विद्युत प्राधिकरणको आधिकारिक ट्रेड युनिएन राष्ट्रिय कर्मचारी युनियन, नेपाल विद्युत प्राधिकरण कर्मचारी संघ र नेपाल विद्युत प्राधिकरण कर्मचारी कल्याण परिषद्ले संयुक्त रुपमा प्राधिकरणका कार्यकारी निर्देशकको ध्यानाकर्षण गराउँदै यस्तो माग गरेका छन् ।

विषम परिस्थितिमा पनि अत्यावश्यक सेवा प्रवाहमा अहोरात्र खट्ने कर्मचारीमा कोरोना भाइरसको संक्रमण देखिन लागेसँगै चिन्ता व्यक्त गर्दै उनीहरुले संक्रमण देखिएका स्थानहरुमा कार्यरत कर्मचारीहरुलाई पहिलो प्राथमिकतामा राखी सम्पूर्ण कर्मचारीको स्वास्थ्य परीक्षण गर्न तथा संक्रमण पुष्टि भए उनीहरुलाई छुट्टै आइसोलेसन कक्षमा राखि उपचारको व्यवस्था मिलाउन आग्रह गरेका हुन् ।

कोरोना भाइरसको जटिल स्थितिका बीच कर्मचारीहरुको मनोबल बृद्धि गराउँदै निरन्तर सेवा प्रवाह गर्न लागि परिरहेको अवस्थामा पछिल्लो समय प्राधिकरणका विभिन्न कार्यालयहरुमा कार्यरत कर्मचारीहरुमा समेत कोरोना भाइरसको संक्रमण देखिएकोमा थप गम्भिर बनाएको ध्यानाकर्षण पत्रमा उल्लेख छ ।

उनीहरुले कार्यालयहरुमा हुने भिडभाडलाई व्यवस्थित गरी सम्भावित जोखिमबाट बच्ने र बचाउने उपाय अपनाउन समेत प्राधिकरण प्रशासनको ध्यानाकर्षण गराएका छन् ।