हामी सबैकाे संसारन्यूज

३२ साउन,इटहरी । कोरोना संक्रमणबाट निको भएर घर फर्किएका एक युवालाई छिमेकीले दुव्र्यवहार गरेका छन् ।

सुनसरीको इटहरी ५ का २७ वर्षीय युवा शुक्रबार धरानस्थित बीपी कोइराला अस्पतालबाट निको भएर घर जान लागेको भन्दै सामाजिक संजालमा खुसी व्यक्त गरेका थिए । तर, त्यो खुसी केही क्षणमा निराशामा परिणत भयो ।

निको भएर घर पुगेका उनलाई छरछिमेकले घरभित्र बस्न दिएनन् । उल्टै ‘हामीलाई रोग सरे को जिम्मेवार हुन्छ ?’ भन्दै छिमेकीले वहिष्कार नै गरे । घरमा तालाबन्दी गरिदिने सम्मको धम्की छिमेकीले दिएपछि उनी घरमा नबसी होटलमा बस्न बाध्य हुनु परेको सोमबारको अन्नपूर्णपोष्ट दैनिकमा समाचार छ ।

उनले कहिलेसम्म होटलमा बसेर निरोगिताको पुष्टि गर्नुपर्ने हो ? उनलाई लखेट्ने समाजले त्यो भनिदिएन । ‘आज अरुलाई पर्ने समस्या भोली आफूलाई पर्छ भन्ने पनि कस्तो नबुझेको,’ उनले भने, ‘रोगभन्दा पनि समाजले मार्नेरहेछ ।’

कोरोना संक्रमणबाट निको भएको पुष्टि भएपछि एम्बुलेन्समा बसेर घर फर्किएका थिए । घर फर्किएपछि ठूलो बुबाको खाली रहेको घरमा बस्ने योजना रहेका उनलाई समाजले अपशब्द बोलेर गाली गरेपछि उनी होटलमा बास बस्न पुगेको दुखेसो गरेका छन् ।

छिमेकीको त्यस्तो व्यवहारपछि स्थानिय निकाय गुहारेका उनलाई इटहरी उपमहानगरपालिकाकी उपमेयर लक्ष्मी गौतमको अग्रसरतामा स्थानीयसँग सहमति गरेपछि उनी घरभित्र बस्न पाएको पनि उनले बताएका छन् ।