हामी सबैकाे संसारन्यूज

काठमाडौं । सत्तारुढ नेपाल कम्युनिष्ट पार्टी (नेकपा)ले सचिवालय बैठक बोलाएको छ । पछिल्लो विकसित घटनाक्रमबारे छलफल गर्न नेकपाले बिहान ९ बजेदेखि सचिवालय बैठक बोलाएको नेकपाका एक सचिवालय सदस्यले जानकारी दिए ।

उनका अनुसार भोली बस्ने सचिवालय बैठकले पार्टी विवाद समाधानका लागि बनाइएको कार्यदलबारे छलफल गर्नेछ । साथै बैठकले अवरूदृ स्थायी समिति बैठकबारे पनि छलफल गर्नेछ ।

केही सचिवालय सदस्यले कार्यदल गठनप्रति असन्तुष्टीसमेत पोखेका छन् । उनीहरुले स्थायी समिति वा सचिवालयबाट समाधान खोजिनुपर्ने विषय अगाडि सारेका छन् ।

शुक्रबार पार्टीका दुई अध्यक्ष केपी शर्मा ओली र पुष्पकमल दाहालबीच कार्यदल गठन गरि विवादको निकास खोज्ने सहमती भएको थियो । सहमतीअनुसार पार्टीमहासचिव विष्णु पौडेलको संयोजकत्वमा ६ सदस्यीय कार्यदल गठन भएको थियो ।

गठित कार्यदलमा ओली पक्षीय समुहबाट महासचिव विष्णु पौडेल र प्रदेश ५ का मुख्यमन्त्री शंकर पोखरेल छन् भने प्रचण्ड पक्षका नेता जनार्दन शर्मा र पम्फा भुसाल छन् । त्यसैगरि वरिष्ठ नेता माधव कुमार नेपाल पक्षका भीम रावल र सुरेन्द्र पाण्डेको पनि सहभागीता छ ।

कार्यदललाई ५ दिनभित्र पार्टी विवादको निकास दिनेगरि निर्देशन दिइएको छ ।