हामी सबैकाे संसारन्यूज

काठमाडौं । सरकारले प्रमुख जिल्ला अधिकारी (सीडीओ)लाई थप अधिकार दिने निर्णय गरेको छ । सोमबार बसेको मन्त्रिपरिषद बैठकले कोरोना भाइरस (कोभिड–१९)को जोखिमलाई ध्यानमा राख्दै थप अधिकार दिने निर्णय गरेको हो ।

मंगलबार मन्त्रिपरिषद बैठकका निर्णयहरु सार्वजनिक गर्दै सरकारका प्रवक्ता एंव सञ्चारमन्त्री डा. युवराज खतिवडाले कोरोनाको जोखिमलाई मध्यनजर गर्दै प्रमुख जिल्ला अधिकारीलाई स्थानीय प्रशासन ऐन २०२८ ले दिएका अधिकारहरु प्रयोग गर्न पाउने निर्णय गरेको जानकारी दिए । उनका अनुसार प्रजिअले जिल्लाभर वा जिल्लाको कुनै भागमा मात्रै पनि निषेधाज्ञा जारी गर्न सक्नेछ ।

खतिवडाका अनुसार निषेधाज्ञा जारी भएको अवस्थामा उल्लंघन गर्नेलाई सरकारले प्रमुख जिल्ला अधिकारीसहित विभिन्न मन्त्रालय र गृह प्रशासनलाई निर्देशन पनि दिएको छ । कोरोना रोकथाम र नियन्त्रणको बारेमा सरकारकाले जारी गरेका जुनसुकै नियम तथा कानून संक्रामक रोग ऐनकै अंग भएको मानेर कारबाहीको निर्देशन दिइएको खतिवडाले जानकारी दिए ।