हामी सबैकाे संसारन्यूज

मलाई पियारो सधैं यो जवानी
यसै राख्न सक्ने भए जिन्दगानी
म हुन्थेँ सदा नै नयाँ पालुवाझैँ
बुढो हुन्नथेँ है ! रहन्थेँ युवा नै ।१।

मनैमा छ इच्छा सधैं बाँचिराख्ने
रमाएर हाँसो, सधैं साँचिराख्ने
अझै त्यो म सानो हुँदाको उमेरै
घुमी फेरि आए खुशी हुन्छु धेरै ।२।

म के यो इरादा गरी पाउँला र ?
बितेको बशन्ती छटा आउला र ?
बगेको नदीझैँ नफिर्ने गरी त्यो
गयो वाल बेला अहा ! जिन्दगीको ।३।

म पाखा, पखेरा हिमाली बनैमा
रमाएर बस्थेँ, खुशीले मनैमा
अझै लोभ लाग्ने सुनौलो बिहानी
थियो जिन्दगीको भयो त्यो कहानी ।४।

हिमाली,पहाडी बनैमा म खेल्थेँ
म साथी सँगैमा रमाई सुसेल्थेँ
कतै गाउँ डुल्दै म हिड्थेँ चहारी
न हुन्थ्यो शिरैमा कुनै बोझ भारी ।५।

छ इच्छा नियाल्ने, खुशीका तरेली
यता आँसु खस्छ, भिजाई परेली
भयो चाहना यो अपूरो सधैंको
भए पूर्ण इच्छा हुने थ्यो सबै यो ।६।

छन्द: भुजङ्गप्रयात

आठराईगा.पा-५,तेह्रथुम
हाल: कनकाई न.पा.-७, झापा