हामी सबैकाे संसारन्यूज

१
पवन रोज्नुहोस् वा गगन मर्जी हजुरको
शयन रोज्नुहोस् वा नयन मर्जी हजुरको
जे रोजे पनि तन मनले शान्ति पाउनु पर्छ
शीतल रोज्नुहोस् वा जलन मर्जी हजुरको ।

२
के को सुख पाइन्थ्यो र यहाँ अल्छी खोजेपछि
माछा मार्न गड्यौला बिनाको बल्छि खोजेपछि
विकास र समृद्धि छन् छरपस्ट रातो किताबमा
राजमार्ग छाडी उही पुरानो गल्छी खोजेपछि

३
कसरी छुट्याउनु सुन सक्कली की नक्कली कसी नभएपछि
कसरी पत्ता लगाउनु चोर हो वा सद्धे भनेर दसी नभएपछि
लेख्न त सधैँ असल कुरा मात्र लेख्न मन गर्छ नी यो मन
खोइ कसरी लेख्नु खराबलाई असल लेख्ने मसी नभएपछि

४
आगो होस् वा पानी यि दुवैको जवानी हुन्छ
तातो र चिसो बीचमा पनि प्रेम कहानी हुन्छ
हिम सुन्दरी हौं तिमी ज्वालालाई दिनु शीतलता
चुम्बन गरौं अधरमा हिम श्रृङ्खला सिरानी हुन्छ ।

५
सक्दैन निभाउन आगो यदि भने के काम त्यो पानीको
पाइन्न काम लाग्ने खनिज यदि भने के काम त्यो खानीको
बोल्दैन उ हेरिरहन्छ मात्र टुलु टुलु हुँदा झगडा पनि
बस्दछ मौन मात्र भएर यदि भने के काम त्यो ज्ञानिको