हामी सबैकाे संसारन्यूज

२५ भदौ, युके । बेलायतमा एक नेपाली युवाको मृत्यु भएको छ । काठमाडौंका युवा रचित कुँवरको ३० वर्षको उमेरमा हृदयघातका कारण बेलायतमै मृत्यु भएको हो ।

कुँवरको हृदयघातका कारण बुधबार दिउँसो साउथ इष्ट लन्डनस्थित आफ्नै निवासमा मृत्यु भएको हो । हृदयघात भएलगत्तै प्यारामेडिक्स टिम आएपनि उनलाई बचाउन नसकिएको उनका भिनाजु सुशील प्रजापतिले बताएका छन् ।

केही महिना अघि नेपाल आएका उनी विश्वव्यापी कोरोना महामारीका कारण जारी लकडाउने बेलायत फर्कन पाएका थिएनन् । दुई दिन अघि (सोमबार) मात्र नेपालबाट बेलायत पुगेका कुवँरको त्यहाँ पुगेको दुईदिनमै मृत्यु भएको हो ।

बुवा आमा नेपालमै रहेको र अविवाहित रहेका कुँवर परिवारसहित अष्ट्रेलयामा बसाइ सर्ने योजना बनाएका थिए । अल्पायुमै भएको उनको मृत्युले परिवार तथा आफन्त अत्यन्तै मर्माहत भएको पासा पुच गुठी यूके साउथ इष्ट लन्डनका अध्यक्ष तथा युवा व्यवसायी समेत रहेका प्रजापतिले संसारन्युजलाई बताए ।

‘सोमबारमात्रै नेपालबाट आएर हामीसँगै बसेका थिए । अचानक यस्तो घटना भयो,’ प्रजापतिले भने,‘ पहिले अन्य त्यस्तो कुनै समस्या थिएन प्रेसरको समस्या थियो ।’

कुँवर युके नेपाल फेडेरेसन अफ बडी बिल्डिङ एण्ड फिटनेस युकेएनएफबीएफ) ले आयोजना गर्ने मिस्टर युके प्रतियोगिताको सन् २०१६ का विजेता समेत हुन् ।