Sansar News
काठमाडौं । सत्तारुढ नेपाल कम्युनिष्ट पार्टी (नेकपा)ले सचिवालय बैठक बोलाएको छ । पार्टी अध्यक्ष पुष्पकमल दाहाल ‘प्रचण्ड’का प्रेस सल्लाहकार विष्णु सापकोटा ‘जुगल’का अनुसार बैठक शुक्रबार बिहान ११ बजेका लागि बोलाइएको छ ।
उनका अनुसार बैठक पेसिडाँडामा सञ्चालन हुनेछ । नेकपाले अधिकांश बैठक प्रधानमन्त्री निवास बालुवाटार र पार्टी केन्द्रीय कार्यालय धुम्बाराहीमा गर्दै आएको थियो । यो पेरिसडाँडामा गरिने पहिलो बैठक हो ।
बैठक पार्टीका कार्यकारी अध्यक्ष प्रचण्डको अध्यक्षतामा बस्ने जनाइएको छ ।
जनाइएअनुसार समसामयिक पार्टी राजनीतिक विषयबारे छलफल गर्न बैठक बोलाइएको हो । बैठकमा पूर्वसभामुख कुष्णबहादुर महरालाई जिम्मेवारी दिने विषयमा छलफल हुनसक्ने बताइएको छ । हालै मात्र महरालाई भेट्न वर्षमान पुन रोल्पा पुगेका थिए ।
वि.सं.२०७७ भदौ ३१ बुधवार १६:४९ मा प्रकाशित
