हामी सबैकाे संसारन्यूज

काठमाडौं । पूर्वसभामुख कृष्णबहादुर महरालाई नेकपाभित्र सक्रिय भूमिका दिने गरि तयारी थालिएको छ । शुक्रबार बस्ने सचिवालय बैठकमा उनको विषयबारे छलफल हुने नेकपा स्रोतले जनाएको छ ।

नेकपाले शुक्रबार बिहान ११ बजे सचिवालय बैठक बोलाएको छ । बैठक साबिक माओवादी केन्द्रको केन्द्रीय कार्यालय पेरिसडाँडामा बस्दैछ । जसको अध्यक्षता पार्टी अध्यक्ष पुष्पकमल दाहाल ‘प्रचण्ड’ले गर्दैछन् ।

न्यूनतम स्थायी समितिमा लैजाने तयारी

नेकपा स्रोतले जनाएअनुसार महरालाई न्यूनतम स्थायी समिति सदस्यका रुपमा भूमिका दिने गरि पार्टीभित्र छलफल भएको छ । पटक–पटक मन्त्री र सभामुखसमेत भएका उनलाई स्थायी समिति सदस्यसँगै कुनै विभागको पनि थप जिम्मेवारी दिइनेछ ।

पार्टी एकता हुनु पूर्व नै सभामुख भएका महरा एकतापूर्व नेकपा माओवादी केन्द्रका सचिवालय सदस्य थिए । उनी ०७४ मा सम्पन्न प्रतिनिधि सभाको निर्वाचनमा दाङ क्षेत्र नम्बर २ बाट निर्वाचित भएका थिए । ०७४ को फागुन २५ मा उनि सभामुखमा निर्वाचित भएका थिए ।

नेकपा स्रोतले जनाएअनुसार पार्टी अध्यक्ष पुष्पकमल दाहाल ‘प्रचण्ड’ले महराको बारे पार्टीभित्र छलफल चलाईरहेका छन् । केहि समय अघि उर्जामन्त्रीको समेत जिम्मेवारीमा रहेका नेकपा नेता वर्षमान पुन महरालाई भेट्न रोल्पा पुगेका थिए । उनले महरासँग विशेष छलफलसमेत गरेका थिए ।

बलात्कार प्रयासको अभियोग लागेको थियो महरामाथि

पूर्वसभामुख कृष्णबहादुर महरामाथि संसद सचिवालयकी महिला कर्मचारीलाई बलात्कार प्रयास गरेको आरोप लागेको थियो । जुन मुद्दामा उनि १३५ दिनसम्म थुनामा समेत बसेका थिए ।

बलात्कार प्रयासको मुद्दामा जिल्ला अदालत काठमाडौंले उनलाई २०७६ फागुन ५ मा निर्दोष सावित गर्दैै थुनामुक्त गरेको थियो । सार्वजनिक सञ्चार माध्यममा समाचार प्रकाशित भएसँगै पक्राउ परेका उनी पीडित भनिएकी महिलाले नै आफुँ पीडित नभएको जिकिरसहित अदालतमा बकपत्र प्रस्तुत गरेसँगै निर्दोष साबित भएका थिए ।

महराले आफुँमाथि आरोप लागेसँगै सभामुख पदबाट राजीनामा दिएका थिए । संघीय संसदमा निलम्बनमा परेको उनको पद सफाई पाएसँगै फुकुवा भएको छ ।