हामी सबैकाे संसारन्यूज

१
भैंसी पालेँ दूध दोएँ खायो बिरालोले,
यो उकाली ओराली र खायो भिरालोले ।
छोराछोरी सबै मेरा जापान अमेरिका,
बृद्धाश्रममा बस्नु पर्ने खायो पिरालोले ।
२
असिना र वर्षेझरी मेरै तनभरी,
सँगसँगै न्याउली रुन्छे पारी वनभरी ।
देख्छु सबै हाँसी खुशी मेरैमात्र के भो ?
गर्नुगर्याे जिन्दगीले कस्तो मनपरी ?
३.
पैसालेनै आज हामीलाई टाढा बनायो,
भोको पेट भरिन्जेललाई गाढा बनायो,
चिल्ला कारमा, तिमी म त पैदल हेर,
यो सहरले तिमीलाई छाडा बनायो ।
४
मलाई मेरै परिवेशको तुईन मन पर्छ,
एकान्तमा परेलीबाट चुहिन मनपर्छ ।
र्याल काढौला कुनैदिन अचार भनेर,
आज आफैँ पिल्सिएर कुहिन मन पर्छ ।
५
मृत्यु कुर्दै सन्तान कति बस्दैछन् खाडीमा,
वर्षैपिच्छे कतिकति फस्दैछन् बाढीमा ।
ओठभरि मुस्कान ल्याउने कुनै सूत्र देखिँदैन
ब्वाँसाहरु दिदी बहिनी डस्दैछन् झाडीमा ।

लमजुङ् दुराडाँडा,हाल कोहलपुर बाँके