हामी सबैकाे संसारन्यूज

काठमाडौं । भारतीय सेनाध्यक्ष जनरल एम एम नरवणे आगामी कात्तिक १९ देखि नेपाल भ्रमणमा आउँदैछन् । उनी नेपाली सेनाको निमन्त्रणामा तीन दिने नेपाल भ्रमणमा आउन लागेका हुन् ।

नेपाली सेनाको औपचारिक निमन्त्रणा र कार्यक्रममा आउन लागेका सेनाध्यक्ष नरवणेको भ्रमणप्रति भने बेग्लै चाँसो बढेको छ । उनको भ्रमणप्रति नेपाल र भारत दुवैतिर चर्चा पनि बढ्न थालेको छ ।

दुई देशबीच चुलिँदै गएको विवादका बीच हुन लागेको भ्रमणलाई धेरैले अर्थपूर्णं रुपमा हेरेका छन् । यसैपनि सेनाध्यक्ष नरवणे नेपाल–भारत विवादमा चर्चामा आईरहने व्यक्ति भने हुन् ।

नेपालमा भन्दा भारतमा चाँसो

सेनाध्यक्ष नरवणेको भ्रमणप्रति नेपालमा भन्दा भारतमा चाँसो देखिएको छ । उनको भ्रमण कार्यक्रम र त्यसको अर्थबारे भारतीय मिडियामा समाचार तथा विश्लेषणहरुले व्यापकता पाएका छन् ।

कतिपय भारतीय सञ्चार माध्यमले नेपाल–भारतबीचको सीमा विवाद र नरवणेको भ्रमणलाई जोडेर चर्चा गरेका छन् भने कतिपयले रअ प्रमुखको भ्रमण र लगत्तै हुन लागेको सेनाध्यक्षको भ्रमणलाई अर्थपूर्णं रुपमा सम्प्रेषण गरेका छन् । धेरै भारतीय सञ्चार माध्यमले रअ प्रमुख सामन्तकुमार गोयलको भ्रमणसँग नरवणेको भ्रमणलाई जोडेका छन् ।

औपचारिक रुपमा नरवणेको भ्रमण नेपाली सेनाको आमन्त्रणमा परम्परागत रुपमा हुने भनिएपनि पछिल्ला विवादमा भ्रमणलाई जोडिएको देखिन्छ । भारतीय अनलाईन जि न्यूज, भास्कर, न्यूज एटिन, इण्डिया टुडे, नभभारत टाइम्सलगायले यस भ्रमणलाई आपसी विवाद समाधानको भ्रमणको रुपमा चित्रण गरेका छन् ।

गोयलको भ्रमणका कारण सेनाध्यक्ष नरवणेको भ्रमण चर्चामा

गत साता भारतीय गुप्तचर संस्था रअका प्रमुख सामन्तकुमार गोयल नेपाल भ्रमणमा आएका थिए । उनले त्यस समय प्रधानमन्त्री केपी शर्मा ओलीदेखि शीर्ष राजनीतिक तहका नेतासँग विशेष भेटघाट गरेका थिए । जुन भ्रमण तथा भेटघाटप्रति नेपालमा निकै चाँसो र चर्चा छ ।

सत्तारुढ नेकपाभित्र गोयलको भ्रमणको कारण थप विवादसमेत जन्मिएको छ । कतिपय नेताहरुले गोयलको भ्रमणप्रति आपत्तिसमेत जनाएका छन् ।

रअप्रमुख गोयल फर्किए लगत्तै नरवणेको भ्रमण तय हुनुलाई नेपालमा धेरैले अन्य प्रश्नबाट समेत हेरेका छन् । जसलाई भारतीय मिडियाले पनि मसलाको रुपमा प्रयोग गरेको देखिन्छ । सेनाध्यक्ष नरवणे यसै पनि नेपाल–भारत विवादमा देखिने पात्र हुन् ।

नेपालविरुद्व आक्रामक प्रस्तुत हुने पात्र हुन् नरवणे

नेपाल–भारतबीचको सीमा विवाद चर्किदैं गर्दा सेनाध्यक्ष नरवणेले नेपालको खुबै विरोध गरेका थिए । नेपालविरुद्व अति नै आक्रामक अभिव्यक्ति दिएर नवरणे चर्चामा समेत आए । नरवणेले दिएको अभिव्यक्तिका कारण पनि नेपाल–भारत सम्बन्धमा देखिएको दरार ह्वात्तै बढेको थियो ।

गत मई ८ मा भारतीय गृहमन्त्री राजनाथ सिंहले नेपाली भूमि लिम्पियाधुरा, लिपुलेकलगायतको क्षेत्रलाई समेट्दै सडकको उद्घाटन गरेका थिए । जसपश्चात दुई देशबीच चर्किएको विवादमा सेनाध्यक्ष नरवणेले ‘नेपाल कसैको इशारामा चलिरहेको’ भन्ने विवादास्पद अभिव्यक्ति दिएका थिए । सेनाध्यक्षले सांकेतिक रुपमा नेपाल चीनको इशारामा चलेको बताएका थिए । जसको नेपालमा व्यापक विरोध भएको थियो ।

नेपाल मामिलामा विवादित पात्र बनेकै कारण सेनाध्यक्ष नरवणेको भ्रमणप्रति पनि विरोध हुन सक्ने सम्भावना छ । उनको भ्रमण तय भए लगत्तै केहि राजनीतिक दलका नेतृत्वकर्ताले भ्रमणप्रति विरोध गर्दै आफ्नो मत राखेका थिए ।