हामी सबैकाे संसारन्यूज

केही बेर सम्म जे सुकै हुँ म
अहिले म भाइरसको एक अंश हुँ
अहिले म कुनै रेष्टुरेन्टमा बसेको छु
टेबुलको वरिपरि
हेर्दैछु मेनु

हिजोसम्म बिस्फोटक पदार्थ परमाणु बम थिएँ
पृथ्वीको केही भाग खाएँ
छिमेकी थिएँ तिम्रो,
सिमानाका केही भाग संक्रमित गरें
केही समयसम्म म रुघाखोकी थिएँ कुनै प्रान्तको
अहिले म भाइरसमा रुपान्तरण भएको छु
खाँदैछु पृथ्वीको अधिकांश फोक्सो
न्युमोनिया भएर पृथ्वी कृत्रिम श्वास लिदैछ,
एक सिलिन्डर अक्सिजन किनेर

म भन्दा कडा महामारी त उहिल्यै पनि थियो
आँखाले यसै पनि नदेखिएको
यो भन्दा गम्भीर महाव्याधि पहिले पनि थियो
संख्यामा गणना मात्र नगरिएको हो
दिमाग खाइरहेथ्यो एक प्रकारको बिषाणुले
मुटुमा नै हानेर
देश खाइरहेथ्यो
मैले भन्दा पहिले
मैले त जम्मा दुई छाक हो खाइरहेको पृथ्वीको

केही अघिसम्म भय भएर खाइरहेथें
अहिले म भाइरस भएर खाइरहेछु
ह्याकुला हृदयको ।
अझ जीब्रो खाने मेरो मन हो पृथ्वीको ।