हामी सबैकाे संसारन्यूज

तेह्र बर्ष पुगेपछि शरीर भयो कस्तो कस्तो ।
अर्कै अर्कै भाछ अरूसँग भन्नै लाज जस्तो ।।
एक मन खुसी, दुः खी अर्को हार होकि जित ।
पेट कम्मर दुख्न थाल्यो, एकदम मज्जासित ।।

बिस्तार बिस्तार थाह भयो, महिना दिनमा हुने ।
शारीरिक परिवर्तन देख्दा, हाँस्ने हो कि रूने ।।
अरूभन्दा यो बेलामा छुट्टै सुत्ने, बस्ने खाने ।
अझै चलन लुक्न भनी, छाउगोठमा जाने ।।

सफा कपडा स्वास्थ खाना, धेरै आराम चाहिने ।
सेनेटरी प्याड प्रयोग गरौँ, हस्पिटलमा पाईने ।।
कति किशोरी स्याहार अभावमा मृत्युको सिकार ।
घरदेखि टाढा राख्दा, कति हुन्छन् बलात्कार ।।

रजस्वला भएपछि आमा बन्न हुने परिपक्व ।
यस्तो बेला जे काम गर्न नि लाग्ने रैछ दिक्क ।।
महिनैपिच्छे १३ देखि ४५ बर्ष सम्म भइनी
आफ्नो ख्याल आफैँ राख्नुपर्छ सानी बहिनी ।।

विशेष ख्याल गर्नु पर्छ हामी अरू बेला भन्दा ।
तरल पदार्थ निकै पिउनु पर्छ तातो मन्द मन्द ।।
हरीया साग सब्जी, फलफूल धेरै धेरै खाउँ ।
फरक खालको समस्यामा स्वास्थ्यचौकी जाउँ ।।