हामी सबैकाे संसारन्यूज

किशोर कोइराला,इनरुवा , सुनसरी

बाँच्नलाई जिउनु पर्ने जिन्दगीको के भरोसा
दुःखको पर्वत नढाल्ने बुर्कुसीको के भरोसा

वृद्ध छन् घरमा,सुसारे छैन सिङ्गो घर छ रित्तै
जन्मघर,वात्सल्य भुल्ने बैगुनीको के भरोसा

चन्द्रको ज्योत्स्ना नियाल्दै छटपटीमा रात काटी
घामको तृष्णा पगाल्ने हुटहुटीको के भरोसा

देवताको मूर्तिमा खुद कोपिला चुँड्दै चढाई
हर खुसीमा बालिएको आरतीको के भरोसा

देख्छ जसले कालको मुखमा सबैको जिन्दगानी
भन्छ ऊ,हैकम गरी बाँच्ने खुसीको के भरोसा

बहर : रमल मुसम्मन सालिम
अर्कान : फाइलातुन् , फाइलातुन् , फाइलातुन् , फाइलातुन्
वजन : २१२२ – २१२२ – २१२२ – २१२२
काफिया : ई
तहलिली रदिफ : को
रदिफ : के भरोसा
अभ्यास : परिश्रमी पाठशाला