हामी सबैकाे संसारन्यूज

कविराज घिमिरे
चाँगुनारायण , भक्तपुर

तोय पिलाए ज्ञान दिलाए
शैक्षिक यात्रा पूर्ण गराए
लक्ष्य पुऱ्याए सुन्दरतामा
परमेश्वर हुन् बाबु र आमा ।। १

भोक बुझेका शोक बुझेका
शीत तापको भेद बुझेका
पृथ्वी ढाक्ने बाग पुराना
परमेश्वर हुन् बाबु र आमा ।। २

शत्रु चिनाए मित्र पढाए
जीवन हाम्रो निम्ति चढाए
मृत्यु जितेका दिव्य सुहाना
परमेश्वर हुन् बाबु र आमा ।।

डाँडा, पाखा, मध्य, कुनामा
वरिपरि छन् यी, यो दुनियाँमा
जीवनपाला पोख्त कलामा
परमेश्वर हुन् बाबु र आमा ।। ४

क्षमाशील यी सौम्य विवेकी
बस्छन् आफू बाधा छेकी
कर्म अलौकिक छन् शुभनामा
परमेश्वर हुन् बाबु र आमा ।। ५

शान्त मनोहर जीवनदाता
धन्य पिता यी धन्य सुमाता
पुज्न सकौँ नित पुण्य धरामा
परमेश्वर हुन् बाबु र आमा ।। ६

छन्द : पादाकुलक
मात्रा : १६