हामी सबैकाे संसारन्यूज

१० मंसिर, काठमाडौं। भारतले मंगलबार अन्य ४३ वटा मोबाइल एप्सलाई प्रतिबन्धित गरेको छ । प्रतिबन्धित एप्सहरुमा चीनया एप्सहरु पनि रहेका छन् ।

भारतको सार्वभौमसत्ता र अक्षुण्णतालाई चुनौती दिएको भन्दै भारतीय सूचना प्रविधि मन्त्रालयले उक्त एप्सहरुमा प्रतिबन्धित लगाएको हो । प्रतिबन्धित एप्समा चीनको बहुराष्ट्रिय कम्पनी अलिबाबा ग्रुपसँग सम्बन्धित चारवटा एप्सहरु पनि रहेका छन् ।

यसअघि पनि भारतले टिकटक, पब्जी लगाएतका चिनियाँ स्वामित्वमा रहेका केही मोबाइल एप्सहरुमाथि प्रतिबन्ध लगाएको थियो । भारत सरकारले चिनियाँ मोबाइल एप्सहरुले भारतीय प्रयोगकर्ताका गोप्य विवरणहरु संकलन गरी चीन पु–याएको आरोप लगाएको थियो ।

चीन र भारतबीच सीमावर्ती लद्धाखका विषयलाई लिएर महिनौंदेखि विवाद छ । सैनिक र कुटनीतिक तहमा सीमा विवादका विषयमा वार्ताहरु भइरहे पनि तनाव जारीनै रहि रहेको छ । वार्तामा अघि सारिएका विषयका बारेमा विवरण सार्वजनिक गरिएको छैन ।

भारतको एप्स प्रतिबन्धलाई लिएर भारतीय सत्तारुढ दलले स्वागत गरेको छ । भारतमा हाल चिनियाँ मोबाइल एप्सहरु तिब्र गतिमा विस्तार र लोकप्रिय भइरहेका छन् । कतिपय चिनियाँ कम्पनीहरुले भारतीय प्रयोगकर्ताका रुचीलाई समेटेर एप्सहरु निर्माण गरेका छन् । रासस–एपी