हामी सबैकाे संसारन्यूज

काठमाडौं । नेत्रविक्रम चन्द ‘विप्लव’ नेतृत्वको नेकपा र पुर्नगठित नेकपा माओवादी केन्द्रबीच एकता हुने भएको छ । नेकपा माओवादी केन्द्र कमिटीको छैठौं बैठकको निर्णय सार्वजनिक गर्दै नेकपा माओवादी केन्द्रका अध्यक्ष गोपाल किराँतीले पार्टी एकताबारे खुलासा गरेका हुन् ।

किराँतीका अनुसार आगामी एक महिनाभित्र दुई पार्टीबीच एकता भईसक्नेछ । ‘मालेमा विचार मान्नेसँग एकता र ध्रुवीकरण हुन्छ, विप्लव नेतृत्वको नेकपासँग छलफलगरी रहेका छौँ, छलफल अन्तिम चरणमा पुर्‍याएका छौँ,’ किराँतीले भने, ‘हामीलाई लाग्छ महिना दिनभित्रै एकता गर्छौँ, त्यसलाई हामीले महान धुर्वीकरण भनेका छौँ।’

किराँतीका अनुसार नेकपा पार्टीमाथि लगाएको प्रतिबन्ध नहटे पनि एकता हुनेछ । ‘पार्टीमाथिको प्रतिबन्ध हटेन भनेपनि एकता गर्छौँ, एकता नगरी भएन, एकता गर्नुभन्दा अघि प्रतिबन्ध हटाए सजिलो हुन्थ्यो, प्रतिबन्ध हटाएन भने एकतापछि एक जुट भएर तोड्ने छौँ’, उनले भने ।

यसअघि विप्लवसहित विभिन्न बाम पार्टीबीच पार्टी एकता गर्नेसम्मको योजनामा कार्यगत एकता भएको थियो । कार्यगत एकता जाेडिएका २२ पार्टी तथा राजनीतिक संगठनहरुले हाल चरणबद्ध रुपमा आन्दोलन गरिरहेका छन् ।