हामी सबैकाे संसारन्यूज

दक्षिण भारतीय फिल्मका सुपस्टार रजनीकान्त राजनीतिमा लाग्ने भएका छन् ।  तमिलनाडुमा आगामी वर्ष हुने विधानसभा चुनाव भन्दा पहिले पार्टी खोल्ने घोषणा गरेका हुन् ।

उनले सामाजिक संजाल ट्विटरमार्फत २०२१ जनवरीमा पार्टी खोल्ने बताउँदै यसका बारेमा ३१ डिसेम्बरमा जानकारी दिइने बताएका छन् ।
नयाँ पार्टी खोल्ने घोषणा गरेसँगै रजनीकान्त आफै विधानसभाको चुनावमा उम्मेदवार बन्न सक्ने आंकलन समेत गरिएको छ ।

रजनीकान्तका प्रवक्ता रियाजले आफ्नो पार्टीले विधानसभा चुनाव जित्ने र इमानदार, पारदर्शी तथा भ्रष्टाचार मुक्त अध्यात्मिक राजनीति दिने बताएका छन् ।

अभिनेता रजनीकान्तले आफ्नो पार्टीमा ६० देखि ६५ प्रतिशत उम्मेदवार ४५ देखि ५० वर्षका र बाँकी सिटमा अन्य पार्टीका राम्रा मानिस, पूर्व न्यायाधिश र पूर्व आइएसलाई दिइने घोषणा गरिसकेका छन् ।

तर राजनीकान्तलाई उनको स्वास्थ्यका कारण डाक्टरहरुले राजनीतिमा नआउन सुझाव दिएका छन् । डाक्टरका अनुसार उनी राजनीतिमा आएपछि कामको धेरै दवाव बढ्ने हुनाले उनको स्वास्थ्यमा प्रत्यक्ष असर गर्ने देखिन्छ ।  तमिलनाडुमा आगामी अप्रिल–मेमा विधानसभाको चुनाव हुन गइरहेको छ ।