Sansar News
काठमाडौँ । साहित्यकार बाबा बस्नेतका कवितासङ्ग्रह ‘युद्धको बाँसुरी’ र गीति एल्बम ‘बिहानी’ तथा सरला शर्माको संस्मरणात्मक कृति ‘स्मृतिका छालहरू’ शुक्रबार (पुस २९) का दिन विमोचन गरिएको छ ।
नेपाल देशभक्त गणतान्त्रिक मञ्चले आज यहाँ आयोजना गरेको कार्यक्रममा प्रधानमन्त्री पुष्पकमल दाहाल ‘प्रचण्ड’ले ती कृति विमोचन गर्दै साहित्यबाट प्रेरित नभएको राजनीति र राजनीतिक उद्देश्य कत्ति पनि नभएको साहित्य लङ्गडो हुने विचार व्यक्त गर्नुभयो ।
उहाँले माओवादी आन्दोलनको आदर्शलाई आत्मसात् गर्नेहरू मात्र निरन्तर आन्दोलनमा रहेको धारणा व्यक्त गर्दै केही पाउँछु र लिन्छु भन्ने स्वार्थले आन्दोलनमा प्रवेश गरेका व्यक्ति पछि बिस्तारै बाहिरिँदै गएको बताउनुभयो ।
कार्यक्रममा नेकपा(माओवादी केन्द्र)का नेता दीनानाथ शर्माले राजनीति अघि बढाउन कलासाहित्यको भूमिका महत्वपूर्ण रहेको औँल्याउनुभयो ।
कार्यक्रममा मञ्चका महासचिव राजु आचार्य, कवि प्रथालगायतले साहित्यले समाजको समसामयिक वस्तुस्थितिको अवगत गराउनाका समाजमा विद्यमान विकृति उजागर गर्न मद्दत पुग्ने बताउनुभयो ।
कार्यक्रममा समाजका विविध क्षेत्रमा योगदान पु¥याएबापत नवीन जोशी, जयबहादुर चन्द, अस्मिता सुमार्गी, तेजेन्द्र खड्का, सुनिल कटुवाल, अनिल ढुङ्गाना, उत्तमकुमार परियार र जितबहादुर विकलाई सम्मान गरिएको थियो ।
त्यस्तै समाज रुपान्तरणका लागि माओवादी केन्द्र्रसँग आबद्ध रही साहित्य, कला र पत्रकारिताका क्षेत्रबाट योगदान गर्ने करिब २५ नारी व्यक्तित्वलाई पनि सम्मान गरिएको थियो ।
वि.सं.२०७३ माघ १ शनिवार ०२:५१ मा प्रकाशित
