Sansar News
काठमाडौं । नेपाल कम्युनिष्ट पार्टी (नेकपा)को प्रचण्ड–नेपाल समुहलाई बहुमत सांसदले साथ दिएका छन् । प्रचण्ड–नेपाल समुहले बुधबार बोलाएको संसदीय दलको बैठकमा भएको उपस्थितिका आधारमा यस्तो देखिएको हो ।
बुधबार बसेको संसदीय दलको बैठकमा प्रतिनिधि सभाका ९३ सांसद उपस्थित भएका थिए । एकिकृत नेकपाको प्रतिनिधिसभा तर्फ सभामुखसहित १७३ सांसद छन् ।
सांसदको संख्याका आधारमा झण्डै ५४ प्रतिशत सांसदले प्रचण्ड–नेपाल समुहलाई साथ दिएको देखिन्छ ।
दुई तिहाई केन्द्रीय सदस्य पनि प्रचण्ड–नेपाल समुहतिरै
पार्टी एकीकरण हुँदा नेकपाका ४४१ सदस्यीय केन्द्रीय समिति बनाएको थियो । जसमध्ये ४ जनालाई मनोनित गरिएको थियो ।
त्यसयता तीन जना केन्द्रीय सदस्यको विभिन्न कारणले मृत्यु भएको छ भने ८ जनाले विभिन्न राजनीति तथा संवैधानिक नियुक्ती लिएर गएका छन् ।
जसअनुसार नेकपाको मौजदुता केन्द्रीय समिति ४३४ सदस्यीय हो । जसमध्ये ३१५ सदस्य प्रचण्ड–नेपाल पक्षमा छन् ।
मंगलबार बसेको केन्द्रीय समिति बैठकमा ३१५ सदस्यले हस्ताक्षर गरेका थिए । प्रचण्ड–नेपाल पक्षले बुधबार निर्वाचन आयोगमा बुझाएको पत्रमा पनि २९० जनाले हस्ताक्षर गरेका छन् ।
जसबाट प्रष्ट हुन्छ नेकपाको बहुमत पक्ष प्रचण्ड–नेपाल समुहमै छन् ।
वि.सं.२०७७ पुस ८ बुधवार १६:५६ मा प्रकाशित
