हामी सबैकाे संसारन्यूज

८ पुस, काठमाडौं । नेपाली कांग्रेसले प्रधानमन्त्री केपी शर्मा ओलीको असंबैधानिक कदमविरुद्ध देशैभरी आन्दोलन गर्ने जनाएको छ ।

मंगलबार र बुधबार पार्टी केन्द्रीय कार्यालयमा बसेको पार्टीको केन्द्रीय समितिको बैठकले देशव्यापीरुपमा आन्दोलनमा जाने कुरामा सबै नेताहरु सहमत भएको बताइएको छ ।

‘तर, कांग्रेसले अन्य दलसँग संयुक्तरुपमा आन्दोलन गर्ने नभएर एकल नेतृत्वमा आन्दोलनमा जाने भन्ने विषयमा हिजोदेखि आ–आफ्नो धारणा राख्नु भएका साथीहरुको विचार आएको छ ।’ कांग्रेस नेता बल बहादुर केसीले संसारन्युजलाई बताए ।

नेता केसीका अनुसार मंगलबार र बुधबार ८ जना नेताहरुले आफ्नो धारणा राखेको र आन्दोलनका कार्यक्रम र समयबारे भने सबै सदस्यको विचार प्राप्त भएपछि मात्र निर्णय गरिनेछ । बैठक फेरि भोली (९ गते) पनि निरन्तर बस्नेछ ।

प्रधानमन्त्री केपी शर्मा ओली तथा नेकपाका अध्यक्षको सिफारिसमा आइतबार प्रतिनिधिसभा विघटन भएसँगै कांग्रेसले प्रधानमन्त्रीको उक्त कदम असंबैधानिक भन्दै त्यसकाविरुद्ध देशैभरी आन्दोलन गर्ने बताएको थियो ।