हामी सबैकाे संसारन्यूज

८ पुस, काठमाडौं । नेपाल कम्युनिष्ट पार्टी (नेकपा) को प्रवास समन्वय कमिटिले विदेशस्थित भातृ संगठनहरुलाई पुष्पकमल दाहाल ‘प्रचण्ड’ र माधब कुमार नेपाल अध्यक्ष रहेको आधिकारीक पार्टीमा गोलवद्ध हुन अनुरोध गरेको छ ।

नेकपाभित्र पछिल्ला चरणमा देखा परेका आन्तरिक संकटका कारण प्रधानमन्त्रीको सिफारिसमा प्रतिनिधिसभा विघटन भएसँगै देशभित्र अहिले राष्ट्रिय संकट देखापरेको अवस्थामा देश तथा विदेशमा रहेका लाखौं समर्थक तथा कार्यकर्तालाई दुःखी तुल्याएको कमिटीले जारी गरेको प्रेस विज्ञप्तिमा भनिएको छ ।

प्रवास समन्वय कमिटीका अध्यक्ष युवराज चौलागाईँ र सचिव श्रीप्रसाद साहद्धारा बुधबार जारी गरिएको विज्ञप्तिमा भनिएको छ, ‘प्रवासमा संगठित प्रवासी नेपाली एकता मन्च र त्यसमा आवद्ध सबै सदस्यहरुलाई हामी धैर्यतापूर्वक क. पुष्पकमल दाहाल प्रचण्ड र क. माधव कुमार नेपाल अध्यक्ष रहेको आधिकारिक नेकपामा गोलबद्ध हुन, पार्टीभित्र पैदा भइरहेको गलत प्रवृत्तीविरुद्ध विधि प्रकृया अनुसार एकतावद्ध भएर परास्त गर्दै अघि बढ्न र विगतमा झै नेपालको हरेक परिवर्तनका मोडहरुमा सक्रियतापूर्वक सहभागी हुन अनुरोध गर्दछौं ।’ उक्त विज्ञप्तिमा भनिएको छ ।