Sansar News
पुस १९, काठमाडौं । कर्णाली प्रदेशका दुई मन्त्री र एक सांसदले प्रधानमन्त्री केपी शर्मा ओलीले नेतृत्व गरेको नेकपाको समुहलाई परित्याग गरेका छन् । प्रदेशका सामाजिक विकास मन्त्री दल रावल, उद्योग पर्यटन तथा वातावरण मन्त्री नन्दसिंह बुढा र प्रदेश सांसद पदमबहादुर रोकायले ओली समुह छाडेका हुन् ।
कर्णाली प्रदेशमा रावल र बुढा ओली पक्षबाट मन्त्री बनेका थिए ।
४१ सदस्यीय कर्णाली प्रदेश सभामा नेकपाका ३३ सदस्य सांसद थिए । जसमा तीन जना थपिएसँगै प्रचण्ड–नेपाल समुहसँग २२ सदस्य पुगेका छन् । ओली पक्षमा हालसम्म सभामुख राजबहादुर शाहीसहित ११ प्रदेशसभा सदस्य छन् ।
पछिल्लो समीकरणसँगै प्रदेशसभामा महेन्द्रबहादुर शाही सरकार बहुमतसहित सुरक्षित देखिएको छ ।
यसअघि गत असोज २५ मा महेन्द्रबहादुर शाहीविरुद्व ओली पक्षीय नेता यामलाल कँडेलको नेतृत्वमा अविश्वासको प्रस्ताव दर्ता भएको थियो । पार्टी एकिकृत अवस्थामै रहेको बेला १८ सांसदले हस्ताक्षर गर्दै शाहीविरुद्व अविश्वासको प्रस्ताव दर्ता गराएका थिए ।
उक्त समय साबिक माओवादीका तर्फका ४ सांसदमा पनि ओली पक्षमा देखिएका थिए । जुन पछिल्लो विभाजनसँगै भने धुव्रिकृत बनेको छ ।
वि.सं.२०७७ पुस १९ आइतवार १६:३६ मा प्रकाशित
