Sansar News
२३ पुष । दुई तिहाई मत पाएर सरकार चलाइरहेको नेपाल कम्युनिष्ट पार्टी(नेकपा) यतिबेला दुई समूहमा विभक्त भएको छ । प्रधानमन्त्री केपी शर्मा ओलिले प्रतिनिधिसभा विघटन गरेसँगै नेकपा दुई समूहमा विभक्त भएको हो । दुवै समूह एकले अर्को पक्षलाई आरोपप्रत्यारोप र गालिगलौजमै आइरहेका छन् ।
यसैबेला प्रधानमन्त्री नेतृत्वको नेकपाका नेता तथा उपप्रधानमन्त्री ईश्वर पोखरेलले भने अझै पनि पार्टी एक हुने सम्भावना रहेको बताएका छन् ।
सिन्धुपाल्चोक बलेफी गाउँपालिका–७ खाडीचौरमा ओली समूहका अगुवा कार्यकर्ता भेलालाई सम्बोधन गर्दै उनले यसो भनेका हुन् ।
उनले प्रधानमन्त्री ओलीले नेतृत्व गरेको नेकपा नै आधिकारिक भएको दाबी गर्दै अध्यक्ष पुष्पकमल दाहालले गल्ती स्वीकार्दै फर्किए पार्टी एक हुने बताएका छन् । ‘प्रचण्डले सबै गल्ती सच्याएर फर्किनुभयो भने पार्टी एक हुने सम्भावना छ, उनले भने ।
पार्टीभित्रको काम गर्न, एकताको बाँकी काम सकाउन, महाधिवेशन केन्द्रित काम गर्न अधिकार दिएकोमा जिम्मेवारी पूरा नगरेको र त्यसैकारण दाहालको कार्यकारी अधिकार खोसेको उनको भनाइ छ ।
उनले आगामी वैशाखमा जसरी पनि निर्वाचन भएरै छाड्ने समेत बताएका छन् ।
वि.सं.२०७७ पुस २३ बिहीवार १९:३१ मा प्रकाशित
