हामी सबैकाे संसारन्यूज

२९ पुष, काठमाडौँ । केपी शर्मा ओली नेतृत्वको नेकपाले निर्वाचन आयोगमा जवाफ पेश गरेको छ । आयोगलाई पठाइएको पत्रमा नेकपा विभाजन नै नभएको बताइएको छ ।

निर्वाचन आयोगले गत २३ गते दुबै समूहलाई राजनीतिक दल सम्बन्धी नियमावलीको नियम २५ अनुसार सात दिनभित्र सच्चाएर जवाफ पेश गर्न भनेको थियो ।

सोही पत्रको जवाफमा ओलीले नेकपा विभाजन नभएको, आफू वरियतामा पहिलो र पुष्पकमल दाहाल दोस्रो अध्यक्ष कायम रहेको बताएका छन ।

उनले आफू प्रथम अध्यक्ष तथा प्रमुख पदाधिकारीको हैसियतमा रहेको हुँदा आफूले पठाएको विवरण बाहेक पार्टीको तर्फबाट अन्य कोही कसैले कुनै विवरण पठाउने अधिकार नभएको र त्यस्तो अनधिकृत विवरणलाई आयोगले अध्यावधिक गर्न नमिल््ने पत्रमा जनाएका छन ।
ओलीले आफू नेतृत्वको पार्टीले कुनै गैरसंवैधानिक काम नगरेको र त्यसमा अन्यले पठाएको विषय पार्टी अनुरुप नभएकाले यसमा नै केन्द्रित रहेर कार्य गर्न समेत आयोगलाई आग्रह गरेका छन । ‘मैले पार्टी प्रमुखको हैसियतमा गरेको कार्य र पार्टीबाट भएका निर्णयहरू कानुनसम्मत विधानको व्यवस्था अनुरुप तथा नेपालको संविधान अनुरुप भएको हुँदा राजनीतिक दलसम्बन्धी ऐन २०७३ को दफ ५१ तथा राजनीतिक दलसम्बन्धी नियमावली २०७४ को नियम २५ बमोजिम अभिलेखीकरण गरिदिनु हुन अनुरोध छ,’ ओलीको पत्रमा उल्लेख छ ।

उनले निवाचन आयोगमा पत्राचार गर्ने सम्बन्धमा पार्टीको तर्फबाट द्वितिय अध्यक्ष पुष्पकमल दाहाल प्रचण्डलाई कुनै अधिकार नदिइएको उल्लेख गरेका छन ।

पत्रमा दाहाल–नेपाल समूहले ओलीलाई अनुशासनको कारबाही गर्दै उनको ठाँउमा माधव नेपाललाई अध्यक्ष नियुक्त गरेको विवरण पेश गर्नुको औचित्य र वैधानिकता नभएको उल्लेख गरेका छन् ।