हामी सबैकाे संसारन्यूज

माघ ४, काठमाडौं । पुष्पकमल दाहाल प्रचण्ड र माधव कुमार नेपालबीच युद्धकालदेखि नै सहकार्य भएको विषय बाहिरिएपछि ओली पक्षीय नेता शंकर पोखरेलले आपत्ति जनाएका छन् । उनले युद्धकालमा एमालेका तर्फबाट ज्यान गुमाउनको जिम्मा कसले लिने भनि प्रश्न गरेका छन् ।

तत्कालिन एमालेका महासचिवसमेत रहेका माधवकुमार नेपालप्रति पोखरेलले ‘पार्टीविरुद्व घात भएन र कमरेड ?’ भनि प्रश्न गरेका छन् ।

‘माधव कमरेड तपाईले जारी गरेको निर्देशन अनुसार तात्कालिक माओवादी उग्रवामपंथको राजनीतिक विरोध र प्रतिवादगर्दा कमरेड यदु गौतमलगायत तात्कालिक एमालेका झण्डै ५०० कार्यकर्ताले जीवन वलिदान गर्नु भएको थियो तर, आज तपाई कमरेड प्रचण्डसंग सुरुदेखिनै सहकार्यमा रहेको दावीगर्दै हुनुहुन्छ’ उनले भनेका छन्, ‘त्यतिवेला साच्चै माओवादी नेता प्रचण्डसँगको सहकार्य रहनु भएको हो भने त्यो पार्टी विरुद्धको घात भएन र कमरेड ?’

उनले माओवादी युद्धमा रहँदै गर्दा माओवादीलाई उग्रवामपन्थ भनेर जारी गरिएको दस्तावेज के हो भनि पोखरेलले प्रश्न गरेका छन् । इतिहासलाई तत्कालै बिर्सन नमिल्ने उनको भनाई छ ।

‘शान्तिप्रकृयामा प्रवेश पछि त हामी सबै सहकार्यमा होइन एकतामा नै बाधिएका हौ, त्यो भन्दा पहिले लामो समयसम्म तपाईकै नेतृत्वमा माओवादी उग्रवामपंथ विरुद्ध वैचाारिक तथा राजनीतिक संघर्षमा रहेको कुरा सत्य होइन र ? यति छिटै इतिहासको कटु सत्यलाई कसरी विर्सन मिल्छ र ?’, पोखरेलले भनेका छन् ।

प्रचण्ड–नेपाल पक्षीय नेकपाको एक भेलामा प्रचण्डले नेपालसँग युद्धकालदेखि नै सहकार्य रहेको बताएका थिए । जसमा नेपालले समर्थन जनाएका छन् ।