हामी सबैकाे संसारन्यूज

जेनेभा । स्वीजरल्याण्डमा एक नेपाली युवाको मृत्यु भएको छ ।
गैरआवासीय नेपाली संघ (एनआरएनए) का पूर्वसदस्य दुर्गा बहादुर तामाङका छोरा २५ वर्षीय सुर्यविर तामाङको मृत्यु भएको हो ।
बक्सिङ खेलाडी समेत रहेका तामाङलाई १७ जनवरीका दिन सामान्य छाति दुख्यो भनेपछि जेनेभास्थित स्थानीय अस्पताल लगेको भएपनि डाक्टरहरुले हृदयघातका कारण मृत्यु भएको घोषणा गरेका थिए ।
अस्पताल पुगेर सुइ लगाएर केहिबेर आराम गर्न भनेर सुताइएका तामाङको केही घण्टामै मृत्यु भएको थियो । डाक्टरले हृदयघात भनेपनि सामान्य डिप्रेसनका पिडित सूर्यको नशाबाट दिइएको औषधिको रिएक्शनका कारण निधन भएको बताइएको छ ।
बाबु दुर्गा तामांगले स्थानीय महान्याधिबक्ता र प्रहरीमा उजुरी गरेका छन । उजुरीपछि मृत शरीरको पोस्टमार्टम गरेलगत्तै परिवारले शनिबार शव बुझेर बौद्ध परम्परा अनुसार दाहसंस्कार गरेको छ ।
दाहसंस्कारका क्रममा तामाङका कलेज र खेल संस्थाका १५० जना स्विस साथीहरु, जेनेभा, जुरीक र बासेल बस्ने नेपालीहरुको बाक्लो उपस्थिति रहेको अन्तिम बिदाइको धार्मिक कर्म सोनाम लामाले गरेका थिए ।
तीन हप्तामा पोस्टमार्टम रिपोर्ट आएपछि कानूनी रुपमा प्रक्रिया अगाडी बढाइने कुरा पिता दुर्गा बहादुर तामांगले बताएका छन। केहि बर्ष अघि डाक्टरको लापरबाहीले जेनेभामा बस्ने नेपाली बृद्धले पनि एउटा आँखाको ज्योति गुमाउनु परेको थियो ।