हामी सबैकाे संसारन्यूज

शहीदले मनुष्यमा जगाउँदै सचेतना ।
दिएर ज्ञान त्यागको महान गर्छ प्रेरणा ।।
नसानसा भराउँदै अदम्य साहसी नशा ।
समाज नै खडा गरेर पार्छ शत्रुको दशा ।।

लगाइ दाउ प्राणको असत्यका विरोधमा ।
परी अगाडि शत्रुको कुकर्मका विरोधमा ।।
कठोर भै प्रहारमा गदा समान भीमको ।
कि बज्र इन्द्रकै बनी उघार्छ द्वार जितको ।।

शहीद हुन्छ अग्निझैँ असाध्य भर्भराउँदो ।
कि हुन्छ वेग वायुको समान घर्घराउँदो ।।
कि बाढ हुन्छ गाढको विशाल गढगढाउँदो ।
प्रचण्ड जण्ड हुन्छ ऊ अनर्थता भगाउँदो ।।

न भोगका मिठासले न सोचले प्रियादिको ।
न लोभले सुवर्णको न चाहले पदादिको ।।
बदल्छ ऊ अठोट वा पछाडि पाउ सार्दछ ।
सिवाय देशको भलो न क्यै अरू विचार्दछ ।।

बिना कुनै सहायता, छली ठगी उपायको ।
तयार हुन्छ मर्न ऊ लिएर दुःख देशको ।।
समाप्त हुन्छ रक्तले बनाई देश उर्बरा ।
खुसी तिमी उजाड वा बनाउ झन् हराभरा ।।

दाहालको ‘यो फूल’ (छन्दोबद्ध कवितासंग्रह) बाट लिईएको कविता