हामी सबैकाे संसारन्यूज

१.
भित्री होस वा वाहिरी ,बेदाग कुनै अनुहार हुँदैन,
दुख छोपिन्न लोसनले, सुखको सृंगार हुँदैन ।
चाहना हो ठूलै राख्नु रहर गर्नु पाप होइन,
यसो त सपना अनेक देखिन्छन्,तर सबै साकार हुँदैन ।

२.
कति उच्चा सोच राख्छौ ? कर्म बोलोस् विचार बोलोस् ।
मुख बोलेर हुन्न साथी, आचरण र व्यवहार बोलोस् ।
क्षणभंगुर हुन्छ भन्छन् अरु सारा प्राप्तिहरु,
जिन्दगीमा मिठास भर्न, मुस्कान बोलोस प्यार बोलोस् ।।

३.
देख्न सुन्न पर्छ सधैं, घटना बिपरित भाको,
होहल्ला र झुट सामु, न्याय प्रभावित भाको,
जति भाका फेरुन तर रत्ति पनि सुहाउँदैन
बेचिएका जिब्रोहरुले, देशभक्तिको गीत गाको ।।

४.
भविष्यलाई डोहोर्याउने,सबको आफ्नै अतीत हुन्छ,
आफ्नै दम्भ दुष्टताले,मान्छे आफैं पतीत हुन्छ ।
राख्नलाई त झिंगो पनि उड्नसक्ने खुवी राख्छ,
तर उसका हरेक उडान, फोहोरतिरै सिमित हुन्छ ।।

५.
उम्री बढने शक्ति भए,संसार ढाक्छ एउटा बिउले,
महाँभारत युद्ध भा’थ्यो, दाजुभाइको सानै निउँले ।
हस्तिनापुर हातपार्न कैयौं युद्ध लड्नुपर्छ,
बिपनामा जिउलाग्दैन,सपनामा खा’को घिउले ।।